Qazaqstan- Túrikmenstan-Iran temirjolynyń múmkindikterin paıdalanýǵa bolady –Toqaev
2022 jylǵy 29 maýsym 19:00

Qazaqstan- Túrikmenstan-Iran temirjolynyń múmkindikterin paıdalanýǵa bolady –Toqaev

AShHABAD. QazAqparat – Bıylǵy 5 aıda qazaqstandyq júkterdi tasymaldaý kólemi 2,5 esege, al Kaspıı mańy elderimen jalpy taýar aınalymy 9%-ǵa artqan. Bul týraly QR Prezıdenti Qasym-Jomart Toqaev altynshy Kaspıı sammıtinde aıtty, dep habarlaıdy QazAqparat tilshisi.

«Qazir bizdiń birinshi kezektegi mindetimiz – Konventsııanyń (Kaspıı teńiziniń quqyqtyq mártebesi týraly konventsııa – red.) tez arada kúshine enýin qamtamasyz etý. Tórt jyl boıy osy máselege qatysty ózara qolaıly sheshimderdi izdeý boıynsha tynymsyz jumys júrgizilip jatyr. Biz taraptardyń ustanymdaryna túsinistikpen qaraımyz, óıtkeni bul máseleler tikeleı ulttyq múddelerdi qozǵaıdy», - dedi Memleket basshysy.

Prezıdenttiń aıtýynsha, dástúrli logıstıkalyq tizbekterdiń alshaq bolýynan kóliktik ózara baılanys memleketterdiń ekonomıkalyq baılanysyn turaqty ósirý men nyǵaıtýdyń sheshýshi faktoryna aınalady.

«Eýropa, Ortalyq Azııa jáne Qytaı arasyndaǵy tranzıttik aǵyndardy qamtamasyz etý úshin Transkaspıı halyqaralyq kólik baǵdarynyń róli aıtarlyqtaı ósti. Bıylǵy 5 aıdyń qorytyndysyna sáıkes atalǵan baǵyt boıynsha qazaqstandyq júkterdi tasymaldaý kólemi 2,5 esege, al Kaspıı mańy elderimen jalpy taýar aınalymy 9 paıyzdan astam ósti. Teńiz arqyly júk tasymalyn ulǵaıtý maqsatymen biz onyń porttyq ınfraqurylymyn jańǵyrtýǵa jáne teńiz flotyn keńeıtýge kiristik. Meniń oıymsha, bizge shuǵyl uıymdastyrý máselelerdi birlesip jáne jedel sheshýge týra keledi», - dedi Q. Toqaev.

Sonymen birge Qazaqstan Prezıdenti perspektıvaly Soltústik-Ońtústik dálizin ári qaraı damytýǵa aıryqsha nazar aýdarý keregin aıtty.

«Ol úshin Shyǵys Azııa men Parsy shyǵanaǵy elderi arasyndaǵy eń qysqa jol – Qazaqstan-Túrikmenstan-Iran temir jolynyń múmkindikterin barynsha paıdalanýǵa bolar edi. Bul jańa logıstıkalyq sheshim nebári 12 kún ishinde 6 myń shaqyrymnan astam jol júrýge múmkindik ashady», - dedi Qasym-Jomart Toqaev.

Seriktester jańalyqtary

Jańalyqtar

Úrdis

MURAǴAT