Qazaqstan syrtqy saýdanyń 40 paıyzyn Eýropalyq Odaqpen jasaıdy
2022 jylǵy 29 maýsym 15:23

Qazaqstan syrtqy saýdanyń 40 paıyzyn Eýropalyq Odaqpen jasaıdy

NUR-SULTAN. QazAqparat – Eýropalyq Odaq Qazaqstan azamattary men memleket arasyndaǵy ózara qarym-qatynastyń tsıfrlyq deńgeıge tolyqtaı kóshýin qoldaıdy. Eýropa Odaǵynyń Qazaqstandaǵy áriptestik ókildiginiń basshysy Iohannes Stenbek osyndaı pikir bildirdi, dep habarlaıdy QazAqparat tilshisi.

Ortalyq Azııadaǵy Eýrazııa qory Eýropalyq Odaqtyń qoldaýymen «Sizdiń daýsyńyz mańyzdy. Tehnologııa arqyly azamattardyń sheshim shyǵarýǵa qatysýy» atty jobany Tsıfrlyq damý, ınnovatsııalar jáne aeroǵarysh ónerkásibi mınıstrligimen birge iske asyryp jatyr.

Osy jumystyń barysy baspasóz brıfınginde talqylanyp, 20-35 aralyǵyndaǵy jastar men jasy 20-dan asqan áıelderdiń azamattyq tehnologııadaǵy tájirıbesi týraly málimet berildi.

«Eýropalyq Odaq toqsanynshy jyldardan beri Qazaqstannyń jaqyn áriptesi bolyp keledi. Búginde Eýropalyq Odaq Qazaqstannyń iri ınvestory ári negizgi saýda seriktesi sanalady. Qazaqstannyń syrtqy saýdasynyń 40 paıyzy Eýropalyq Odaqqa tıesili», - dedi uıym ókili.

Onyń aıtýynsha, Qazaqstan keıingi 30 jylda túrli ózgeristerdi bastan ótkergen.

«Eýropalyq Odaq Ortalyq Azııanyń ózge elderimen birge áreket etý isinde Qazaqstanmen jańasha tásilder arqyly jumys isteı alady. Bizdiń qarym-qatynasymyz qazirgi kezeńde keńeıtilgen áriptestik pen seriktestik kelisimine negizdelgen. Ol kelisim 2020 jyly zańdy kúshine engen. Qujat 29 saıası baǵytty qamtıdy. Onyń ishinde saıası dıalog, demokratııa, adam quqyqtary, qoǵamdy aqparattandyrý, ekonomıkany ornyqty damytý sııaqty baǵyttar bar», - dedi Iohannes Stenbek.

Sondaı-aq, ol Eýropalyq Odaq Qazaqstannyń tsırflyq reformalar men tsıfrlyq transformatsııa baǵytyndaǵy bastamalaryn qoldaıtynyn aıtty.

«Jańa Qazaqstandy azamattyq qoǵamy kúshti tıimdi memleket etip qurý úshin jastar men áıelderdiń múmkindikterin keńeıtý qajet. Olardyń qolynda azamattyq tehnologııalar, tıisti bilim men tsıfrlyq qabilet bolsa, naǵyz kóshbasshyǵa aınala alady. Bul jobany iske asyra otyryp biz Qazaqstanǵa zamanaýı memleket qurý máselesinde kómektesemiz. Qazaqstandaǵy qańtar oqıǵasy saıası reformany shuǵyl arada jalǵastyrý qajettigin kórsetti. Bılik «Halyq únine qulaq asatyn memleket» tujyrymdamasyn tolyq kólemde iske asyrýy kerek. Biz Qazaqstan Prezıdentiniń demokratııalandyrý men ortalyqsyzdandyrýǵa baǵyttalǵan reformalar paketin bastama etip kótergen úndeýin jyly qabyldap otyrmyz», - dedi spıker.

Aıta keteıik, buǵan deıin QR Prezıdenti Qasym-Jomart Toqaev Ýkraınanyń Eýropalyq odaqqa múshe bolý múmkindigine pikir bildirgen edi.


Seriktester jańalyqtary

Jańalyqtar

Úrdis

MURAǴAT