Qazaqstan Shyǵys pen Batys arasyndaǵy «aralyq naryq» retinde paıdasyn tıgize alady - QR Prezıdenti
2022 jylǵy 24 maýsym 20:28

Qazaqstan Shyǵys pen Batys arasyndaǵy «aralyq naryq» retinde paıdasyn tıgize alady - QR Prezıdenti

NUR-SULTAN. QazAqparat - Qasym-Jomart Toqaev BRIKS+ uıymynyń jahandyq damý jónindegi joǵary deńgeıli dıalogynda arjy ahýalynyń nasharlaýy qaryzy kóp memleketterge, bıznes pen otbasylardyń turmystyq jaǵdaıyna aýyr tıip qana qoımaı, jahandyq jetkizý jelisiniń buzylýyna ákep soqtyratynyn aıtty.

Sondaı-aq, QR prezıdenti álem boıynsha ınflıatsııanyń qarqyndy ósýi sheshimin qajet etetin taǵy bir ózekti mindet ekenin atap ótti.

– Qazaqstan Shyǵys pen Batys, Ońtústik pen Soltústik arasyndaǵy «aralyq naryq» retinde paıdasyn tıgize alady. Uzaq merzimdi perspektıvada bizge ashyq, ádil, ózara úılesimdi ári ornyqty jahandyq ekonomıkany saqtap qalý kerek. Bul rette, ósim men ózara baılanystylyqtyń jańa dáýirine jol ashatyn BRIKS+ jáne «Bir – beldeý, bir – jol», sondaı-aq Úlken Eýrazııalyq seriktestik bastamalarynyń mol áleýeti bar ekenin kórip otyrmyn, – dedi Prezıdent.

Prezıdent Ornyqty damý salasyndaǵy maqsattarǵa qol jetkizýdiń mańyzdy ekenine nazar aýdardy.

– BUU Bas hatshysy Antonıý Gýterrıshtiń Sammıtti kelesi jyly shaqyrý arqyly BUU-nyń 2030 jylǵa deıingi kún tártibin júzege asyrýǵa kúsh salý jónindegi belsendiligin quptaımyn. Biz barlyǵyn, ásirese, áıelderdi, jastar men balalardy, egde adamdar men múmkindigi shekteýli jandardy eskerýsiz qaldyrmaı, óz mindettemelerimizdi naqtylaýymyz qajet. BRIKS+ elderi Soltústik pen Ońtústik arasyndaǵy alshaqtyqty qysqartýǵa jáne damýdaǵy teńsizdikti joıýǵa óz úlesin qosa alar edi, – dedi Memleket basshysy.

Aıta keteıik, buǵan deıin Prezıdent Qasym-Jomart Toqaev QHR Tóraǵasy Sı Tszınpınniń shaqyrýymen BRIKS+ uıymynyń jahandyq damý jónindegi joǵary deńgeıli dıalogyna onlaın formatta qatysqanyn jazǵan edik.


Uqsas jańalyqtar

Jańalyqtar

Úrdis

MURAǴAT