Qazaqstan shyǵaratyn «Shaǵala-M» dronyn Serbııa satyp aldy
2022 jylǵy 15 tamyz 15:19

Qazaqstan shyǵaratyn «Shaǵala-M» dronyn Serbııa satyp aldy

NUR-SULTAN. QazAqparat – «Qazaqstan ınjınırıng» ulttyq kompanııasy pılotsyz ushatyn «Shaǵala-M» apparatynyń serııaly óndirisin jolǵa qoıyp jatyr, dep habarlaıdy QazAqparat tilshisi.

Bul týraly aktsıonerlik qoǵamnyń basqarma tóraǵasy Temirjan Ábdirahmanov QazAqparat saýalyna joldaǵan jaýabynda aıtty.

«Shynymdy aıtsam, men áskerı ǵylymmen aınalysatyndardyń barlyǵyn biriktirgim keledi. Quzyrettilik ortalyǵy quryldy. Mysaly, ǵalymdarymyz ben konstrýktorlarymyz «Shaǵala» ushqyshsyz ushý apparatyn jasap shyǵarsa, qazir ony jańartyp, «Shaǵala-M» serııaly óndirisin jolǵa qoıyp jatyrmyz. Ol kóp fýnktsııaly barlaý ushqyshsyz ushý apparaty bolady. Jaqynda biz óz mamandarymyzdyń ázirlemesin Serbııadan kelgen seriktesterge sattyq. Bul jańa ónimderdiń alǵashqy eksporttyq mámilesi», - deıdi kompanııa basshysy.

Ulttyq kompanııa bazasynda qorǵanys salasyna qajetti ondaǵan joba pysyqtaýdan ótip jatqan kórinedi.

«Qazirgi tańda biz bir mezgilde 70-ten astam áskerı jáne azamattyq jobany ázirlep jatyrmyz. Aldaǵy 5 jyldyń ishinde naryqqa jańa ónimder shyǵaratynymyzǵa senimdimin. Jańa damý tujyrymdamasy aıasynda óndiris pen eksportty ártaraptandyrý josparlanýda», - deıdi Temirjan Ábdirahmanov.

Aıta keteıik, buǵan deıin Qorǵanys mınıstrligi túrkııalyq brondy tehnıkany satyp alý úshin synaqtan ótkizetinin habarlaǵan bolatyn.


Foto : gov.kz




Seriktester jańalyqtary

Jańalyqtar

Úrdis

MURAǴAT