Qazaqstan Reseımen barlyq baǵyttar boıynsha strategııalyq seriktestikti damytýǵa nıetti – Álıhan Smaıylov
2022 jylǵy 4 shilde 20:43

Qazaqstan Reseımen barlyq baǵyttar boıynsha strategııalyq seriktestikti damytýǵa nıetti – Álıhan Smaıylov

NUR-SULTAN. QazAqparat – Qazaqstan Úkimeti barlyq baǵyttar boıynsha Reseımen strategııalyq seriktestikti damytýǵa nıetti. Bul týraly QR Premer-Mınıstri Álıhan Smaıylov Ekaterınbýrg qalasynda XII «INNOPROM» Halyqaralyq ónerkásiptik kórmesi aıasynda RF Úkimetiniń Tóraǵasy Mıhaıl Mıshýstınmen kezdesýinde aıtty, dep habarlaıdy QazAqparat Úkimttiń resmı saıtyna silteme jasap.

Kezdesý barysynda QR Premer-Mınıstri bıyl bizdiń el «INNOPROM» kórmesiniń seriktesi, osyǵan baılanysty Qazaqstan tarapynan memlekettik sektor men bıznes-qoǵamdastyq ókilderinen quralǵan resmı delegatsııa kelip otyrǵanyn aıtty.

«Bizdiń kompanııalar ózderiniń ázirlemelerin kórsetý, tıimdi jáne perspektıvaly iskerlik baılanystar ornatý úshin berilgen múmkindikti tolyq kólemde paıdalanady dep sanaımyn», - dedi Álıhan Smaıylov.

Premer-Mınıstr Qazaqstan men Reseı arasyndaǵy ózara memleketaralyq baılanystar joǵary deńgeıde ekenin atap ótti. Ekijaqty qarym-qatynastyń erekshe sıpaty memleketter basshylary kezdesýleriniń joǵary qarqynymen de rastalyp otyr.

«Qazaqstan Úkimeti ekonomıkalyq yntymaqtastyqty tereńdetýge baǵyttalǵan ózara is-qımyldyń barlyq baǵyttary boıynsha belsendi dıalogqa daıyn», - dep atap ótti Álıhan Smaıylov.

Reseı – Qazaqstannyń negizgi saýda-ekonomıkalyq seriktesi. 2021 jyldyń qorytyndysy boıynsha ekijaqty taýar aınalymy úshten birge ósip, $24,2 mlrd-qa jetti. Bul – Qazaqstan-Reseı saýdasy úshin rekordtyq kórsetkish.

Osy jyly oń dınamıka saqtalyp otyr – qańtar-mamyr aılarynda ózara saýda 5%-ǵa ósip, $9,2 mlrd-qa jetti.

«Elderimiz arasyndaǵy kópjosparly ekonomıkalyq baılanystardy damytý boıynsha júıeli jumys júrgizilip jatyr. Ekijaqty ózara is-qımyldyń jáne saýda aınalymyn ulǵaıtýdyń keń aýqymdy máselelerin sheshýde Qazaqstan-Reseı Úkimetaralyq komıssııasy erekshe ról atqarady. Bul turǵyda ekonomıkalyq yntymaqtastyqtyń 2021-2025 jyldarǵa arnalǵan keshendi baǵdarlamasyn ýaqtyly iske asyrý mańyzdy», - dedi QR Úkimetiniń basshysy.

Álıhan Smaıylov ónerkásiptik kooperatsııa Qazaqstan men Reseı yntymaqtastyǵynyń basym baǵyttarynyń biri ekenin aıtty.

Osylaısha, ónerkásip salasyndaǵy birlesken kúsh-jigerdiń nátıjesinde $437,8 mln-ǵa 13 iri kooperatsııalyq joba jáne $3 mlrd-qa 9 jańa joba iske asyryldy.

«Bul jumystyń tıimdiligin tómendetpeý mańyzdy. Qazaqstan úkimeti barlyq baǵyttar boıynsha Qazaqstan-Reseı strategııalyq áriptestiginiń serpindi damýyn qamtamasyz etý úshin kóp josparly jumysty jalǵastyrýǵa nıetti», - dep túıindedi QR Premer-Mınıstri.

Óz sózinde Mıhaıl Mıshýstın Reseı Úkimetiniń Qazaqstanmen dostyq pen áriptestikti odan ári nyǵaıtýdy sózsiz basymdyq retinde qarastyratynyn atap ótti.

«Bizdiń yntymaqtastyq ýaqytpen tekserilgen jáne syrtqy synaqtarǵa tózimdiligin birneshe ret dáleldegen», - dedi M. Mıshýstın.

Kezdesý barysynda Úkimet basshylary keń aýqymdy máselelerdi, onyń ishinde saýda-ekonomıkalyq, kólik jáne gýmanıtarlyq salalardaǵy yntymaqtastyq máselelerin talqylady.


Uqsas jańalyqtar

Jańalyqtar

Úrdis

MURAǴAT