Qazaqstan Prezıdenti Dúnıejúzilik ekonomıkalyq forým qatysýshylaryna beıneúndeý jasady
2022 jylǵy 24 mamyr 21:15

Qazaqstan Prezıdenti Dúnıejúzilik ekonomıkalyq forým qatysýshylaryna beıneúndeý jasady

NUR-SULTAN. QazAqparat - Qazaqstan Prezıdenti Qasym-Jomart Toqaev Dúnıejúzilik ekonomıkalyq forýmnyń qatysýshylaryna beıneúndeý jasady. QazAqparat bul týraly Aqordaǵa silteme jasap habarlaıdy.

Osy kúnderi Davosta ótip jatqan Dúnıejúzilik ekonomıkalyq forým aıasynda Memleket basshysy Qasym-Jomart Toqaev «Astana» halyqaralyq qarjy ortalyǵy uıymdastyrǵan dóńgelek ústel otyrysyna qatysýshylarǵa beıneúndeý joldady.

Memleket basshysy óz úndeýinde álemdik kún tártibindegi ózekti máselelerge nazar aýdardy. Qasym-Jomart Toqaevtyń pikirinshe, COVID-19 pandemııasyna qatysty jaǵdaı men Ýkraınadaǵy oqıǵalar álemdik ekonomıkanyń bólshektenýine túrtki boldy. Bul Eýrazııa qurlyǵynda jańa geosaıası synaqqa alyp keldi.

Prezıdent pandemııaǵa qarsy kúres aıasynda densaýlyq saqtaý júıesin jetildirýge, shaǵyn jáne orta bıznesti, ınfraqurylymdyq jobalardy qoldaýǵa qatysty memleket qabyldap jatqan sharalar týraly aıtty.

Sonymen qatar Qasym-Jomart Toqaev forýmnyń qatysýshylaryna elimizde júrgizilip jatqan aýqymdy saıası-ekonomıkalyq reformalar jóninde, Konstıtýtsııaǵa ózgerister men tolyqtyrýlar engizýdi kózdeıtin aldaǵy respýblıkalyq referendýmǵa daıyndyq barysy týraly jan-jaqty málimet berdi.

Memleket basshysy qorshaǵan ortany qorǵaý, áleýmettik jáne korporatıvtik basqarý (ESG) salalaryndaǵy maqsattardy júzege asyrýǵa Qazaqstannyń beıildi ekenin atap ótti.

Prezıdent elimizdiń álemdik naryqtarǵa taýarlardy, shıkizatty jáne aýyl sharýashylyǵy ónimderin úzdiksiz jetkizý isin qamtamasyz etýde senimdi seriktes bolyp qala beretinin málimdedi.

«Jasyl» ekonomıkany damytý, energetıkanyń tıimdiligin arttyrý jáne jańartylatyn energııa sektoryn órkendetý bizdiń Kómirtegin tómendetý jónindegi strategııamyzdyń basymdyqtary sanalady. Bul 2060 jylǵa qaraı qaldyqtardy múlde joıýǵa ońtaıly jol ashady», – dedi Qazaqstan Prezıdenti.

Qasym-Jomart Toqaev sóziniń sońynda Qazaqstannyń adam quqyqtary men zań ústemdigi salasyndaǵy halyqaralyq mindettemeler men qaǵıdattarǵa adal ekenin atap ótti.

Dóńgelek ústelge iri jahandyq ınvestıtsııalyq kompanııalardyń, kommertsııalyq emes sektordyń jáne halyqaralyq BAQ ókilderi qatysty.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT