+7 (701) 759 90 19
USD 428.05 EUR 501.2
RUB 5.47 CNY 63.87
Jańalyqtar

Qazaqstan Prezıdenti BUU 75 jyldyǵyna arnalǵan Joǵary deńgeıdegi sharada sóz sóıledi

2020 jylǵy 21 qyrkúıek 22:16
Bólisińiz:
Qazaqstan Prezıdenti BUU 75 jyldyǵyna arnalǵan Joǵary deńgeıdegi sharada sóz sóıledi

NUR-SULTAN. QazAqparat – QR Prezıdenti Qasym-Jomart Toqaev BUU Bas Assambleıasynyń 75 jyldyǵyna arnalǵan Joǵary deńgeıdegi is-sharada beıneúndeý jasady. Atalǵan shara koronavırýs indetine baılanysty onlaın formatta ótti.

QazAqparat Aqordaǵa silteme jasaı otyryp Memleket basshysynyń sóılegen sóziniń tolyq mátinin usynady

* * *

Qurmetti Tóraǵa,

Qurmetti Bas hatshy,

Qymbatty áriptester, hanymdar men myrzalar!

Adamzat jylnamasyndaǵy eń joıqyn Dúnıejúzilik soǵystan keıin 1945 jyldyń maýsym aıynda múldem jańa Uıymnyń qurylýy – barshamyz úshin aıtýly ári tarıhı oqıǵa.

Dag Hammarsheldtiń Birikken Ulttar Uıymy «bizdi jumaqqa jetkizý úshin emes, tozaqtan qutqarý úshin qurylǵan» degen qanatty sózi barshaǵa aıan.

Bastapqyda BUU ujymdyq qaýipsizdikti qamtamasyz etý júıesi retinde qurylǵanymen, is júzinde álem elderin ortaq maqsat pen múddege biriktirdi. Sonyń arqasynda belsendi ári aýqymdy halyqaralyq yntymaqtastyq dáýiri ornyqty.

Árıne, bul jol jeńil bolǵan joq. Ókinishke qaraı, ótken 75 jyl ishinde álemdi qaıǵy-qasiretten aryltýǵa baǵyttalǵan ortaq maqsattarymyz ben qundylyqtarymyzdy ilgeriletý jolynda kóptegen múmkindikti qoldan jiberip aldyq.

Degenmen, sátsizdikten de, jetistikten de sabaq alǵan jón. BUU-nyń tereń tarıhy belsendi ujymdyq kúsh-jigerdiń arqasynda keń aýqymdy máselelerdi talqyǵa salý kezeńi boldy. Atap aıtqanda, otarsyzdanýdan ósip-órkendeýge, balalardy qorǵaýdan klımattyń ózgerýine, densaýlyq saqtaý isinen adam quqyǵyna, beıbitshilikti qoldaýdan bitimgershilikke deıingi taqyryptar qamtyldy.

Sońǵy otyz jylda Qazaqstan BUU-nyń barlyq basty organdarynda, sonyń ishinde, Qaýipsizdik Keńesinde janjaldardy retteý, ıadrolyq qarýdy taratpaý jáne qarýsyzdaný, terrorızmge qarsy kúres, konfessııaaralyq jáne ultaralyq dıalog, teńizge shyǵa almaıtyn damýshy elderdiń múddesin qorǵaý sııaqty basymdyqtardy dáripteýge atsalysty.

Al, endi búgingi zamannyń sıpatyna zer salsaq, kóptegen jańa syn-qaterler, sondaı-aq qaıta etek alǵan keıbir táýekelder bizdi ótken kezeńge oraltýy múmkin ekenin baıqaımyz.

Qazirgi tańda mýltılateralızm zor qaterge tap boldy. Mundaı ahýal qyrǵı-qabaq soǵys aıaqtalǵannan beri týyndamaǵan edi.

COVID-19 indetin aýyzdyqtaý asa qıyn bolyp otyr. Álemde jappaı qarýlaný úderisi qaıtadan beleń alyp keledi. Strategııalyq damý maqsattaryn júzege asyrý isi turalap qaldy.

BUU Jarǵysynda bekitilgen murat-maqsattar budan bylaı kádege aspaıdy degen pikir taraýda.

Men óz elimniń Prezıdenti jáne BUU-nyń burynǵy joǵary laýazymdy tulǵasy retinde bul kózqaraspen múlde kelispeımin.

Buǵan qaramastan, biz

úmit otyn óshirmeı, qaıta ony laýlatýymyz kerek;

ortaq murat-maqsattan bas tartpaı, oǵan qol jetkizý úshin kúsh-jigerimizge tyń serpin berýimiz qajet;

anarhııaǵa jol bermeı, halyqaralyq quqyqqa negizdelgen qoǵamdastyq qurýdy jalǵastyrýǵa tıispiz.

Bul – óte kúrdeli mindetter. Aldaǵy onjyldyq 2030 jylǵa deıingi ornyqty damýdyń kún tártibinde turǵan mindetterin júzege asyrý jáne qazirgi zamanǵy daǵdarystardy eńserýdiń tıimdi jolyn tabý úshin sheshýshi kezeń bolady.

Bul aýqymdy maqsat ortaq kúsh-jigerdi jáne jaýapkershilikti talap etedi.

Biz Bas hatshy Antonıý Gýterrıshtiń tabandy kóshbasshylyq qyzmetine rızashylyq bildiremiz.

Sondaı-aq, onyń Birikken Ulttar Uıymyndaǵy tıimdilikti, ashyqtyq pen aıqyndyqty arttyrý jónindegi qazirgi jumysyna qoldaý kórsetemiz.

Qazaqstan BUU-nyń mıssııasy men Jarǵysyn berik ustanady. Sonymen qatar, elimiz turaqty, ádiletti jáne órkendegen álem qurý jolyndaǵy ortaq mindetti júzege asyrýǵa atsalysady.

Birikken Ulttar Uıymy aýqymdy ári birden-bir ámbebap halyqaralyq uıym retinde shyn máninde balamasyz bolyp qala beretinine senimdimin.

Nazarlaryńyzǵa raqmet!





Bizdiń kanalymyzǵa jazylyńyz:

Bólisińiz:
Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Jarylqasyn Saıagúl
Jarylqasyn Saıagúl
954-059

MURAǴAT