Qazaqstan Ortalyq Azııadaǵy medıtsınalyq týrızmniń ortalyǵyna aınalyp keledi - Prezıdent
2022 jylǵy 1 shilde 10:46

Qazaqstan Ortalyq Azııadaǵy medıtsınalyq týrızmniń ortalyǵyna aınalyp keledi - Prezıdent

NUR-SULTAN. QazAqparat – Elordada ótip jatqan halyqaralyq neırohırýrgııa forýmynyń qatysýshylaryna QR Prezıdenti Qasym-Jomart Toqaev quttyqtaý hat joldady, dep habarlaıdy QazAqparat tilshisi.

Memleket basshysynyń quttyqtaýyn forýmǵa qatysýshylarǵa QR Premer-Mınıstriniń orynbasary Eraly Toǵjanov oqyp berdi.

«Qurmeti forýmǵa qatysýshylar! Sizderdi halyqaralyq neırohırýrgııa forýmynyń jáne osyǵan oraı uıymdastyrylǵan taqyryptyq kınofestıvaldiń ashylýymen quttyqtaımyn. Álemge tanymal akademık A. Konovalov bastaǵan bilikti ǵalymdardyń búgingi basqosýy otandyq densaýlyq saqtaý isin damytýǵa tyń serpin bereri sózsiz», - dep jazylǵan Prezıdenttiń quttyqtaý lebizinde.

Sondaı-aq, Qasym-Jomart Toqaev hatynda atalmysh sharany uıymdastyryp otyrǵan Ulttyq neırohırýrgııa ortalyǵy Qazaqstanda neırohırýrgııa salasynyń alǵa basýyna zor úles qosyp kele jatqanyn atap ótti.

«Bul mekeme Ortalyq Azııadaǵy úzdik medıtsına uıymdarynyń qataryna kiredi. Byltyr óńirde alǵashqylardyń biri bolyp osynda «gamma-pyshaq» qondyrǵysy ornatyldy. Sońǵy bir jyl ishinde 500-ge jýyq asa kúrdeli operatsııa jasaldy. Elimizde dúnıejúzine áıgili mamandarmen tyǵyz qarym-qatynas ornatyp, tájirıbe almasýǵa, sondaı-aq, otandyq neırohırýrgııaǵa ozyq tehnologııalardy engizýge barlyq jaǵdaı jasalǵan. 2025 jylǵa deıingi Ulttyq damý josparynda densaýlyq saqtaý júıesin damytý basty basymdyqtyń biri retinde belgilengen. Bizdiń dárigerlerimiz halyqqa joǵary sapaly qyzmet kórsetýde. Qazaqstan aımaqtaǵy medıtsnalyq týrızmniń ortalyǵyna aınalyp keledi. Búgingi jıynda qazirgi zamanǵy ǵylymı jańalyqtardy el ıgligine baǵyttaıtyn kóptegen tyń ıdeıalar aıtylady dep senemin», - delingen Prezıdent quttyqtaýynda.


Uqsas jańalyqtar

Jańalyqtar

Úrdis

MURAǴAT