Qazaqstan men Túrkııa náreste reanımatsııasy boıynsha birlesken jobany iske qospaq
NUR-SULTAN. QazAqparat – Qazaqstan men Túrkııa mamandary jańa týǵan náreste reanımatsııasy boıynsha birlesken jobany qolǵa almaqshy. Qazir bul qujat eki eldiń memlekettik organdarynyń maquldaýynda, dep habarlaıdy QazAqparat tilshisi.
Bul týraly QR Densaýlyq saqtaý mınıstrligi QazAqparat agenttiniń saýalyna joldaǵan jaýabynda aıtty.
«Jobanyń negizgi maqsaty – otbasy medıtsınasynda, ınfektsııalyq jáne ınfektsııalyq emes aýrýlarmen kúreste, dárigerlerdi oqytý isinde jáne ana men bala ólimin azaıtý baǵytynda tájirıbe almasý. Qazir atalǵan kelisim memlekettik organdardyń maquldaýynda jatyr», - dep jazylǵan vedomstvonyń málimetinde.
Qujattyń taǵy bir baǵyty boıynsha aýrýhanalardy basqarý, farmatsevtıka, medıtsınalyq buıymdar men qondyrǵylar óndirisi, vaktsına ázirleý jáne kosmetıkalyq ónim shyǵarý isi salasynda aqparat jáne tájirıbe almasý kózdelip otyr. Sondaı-aq medıtsına personalynyń áleýetin arttyrýǵa baǵyttalǵan qysqa merzimdi trenıngter ótkizý, sarapshylar men keńes berý qyzmetin almasý, densaýlyq saqtaý salasyndaǵy adam kapıtalyn damytý boıynsha áriptestikti nyǵaıtý josparlanyp otyr.
Aıta keteıik, QR Prezıdentiniń Túrkııa memlekettik sapary aıasynda eki eldiń basshylary keńeıtilgen strategııalyq seriktestik jóninde málimdeme jasaǵan bolatyn.
Ol málimdemede taraptar syrtqy saıasat, qorǵanys jáne qaýipsizdik, ekonomıka, saýda, ınvestıtsııa, ónerkásip, taý-ken ónerkásibi, ǵylym jáne tehnologııa, kólik, aqparattyq-kommýnıkatsııalyq tehnologııalar jáne kıberqaýipsizdik, energetıka, qorshaǵan orta jáne ýrbanızatsııa, densaýlyq saqtaý, otbasy jáne áleýmettik qyzmetter, azyq-túlik, aýyl sharýashylyǵy, apattar men tótenshe jaǵdaılar, bilim berý, buqaralyq aqparat quraldary men kommýnıkatsııalar, mádenıet, týrızm, sport, arhıv salalaryndaǵy yntymaqtastyq pen úılestirýdi tereńdetý jáne osy baǵyttaǵy ekijaqty yntymaqtastyq tetikterin ulǵaıtý arqyly olardy barynsha paıdalanýǵa kelisim jasalǵany aıtylǵan.
