Qazaqstan men Koreıa keden salasyndaǵy ózekti máselelerdi talqylady
2022 jylǵy 27 mamyr 22:03

Qazaqstan men Koreıa keden salasyndaǵy ózekti máselelerdi talqylady

SEÝL. QazAqparat - Koreıa Respýblıkasy dástúrli túrde Qazaqstannyń negizgi saýda seriktesteriniń ondyǵyna kiredi. Bul týraly QR Qarjy mınıstrligi Memlekettik kirister komıteti tóraǵasynyń orynbasary Qaırat Jumaǵulov Koreıanyń keden qyzmetiniń komıssary ıÝn The Shıkpen kezdesýde aıtty, dep habarlaıdy QazAqparat.

Osy kúnderi Qazaqstan Respýblıkasy Qarjy mınıstrliginiń Memlekettik kirister komıteti Koreıa Respýblıkasynyń keden qyzmetiniń qoldaýymen Seýl qalasynda ótip jatqan Ortalyq Azııa óńirlik ekonomıkalyq yntymaqtastyǵy (OAÓEY) Kedendik yntymaqtastyq komıtetiniń keden ákimshilikteri basshylarynyń forýmyna qatysýda.

Qazaqstandyq delegatsııany komıtet tóraǵanyń orynbasary Q. Jumaǵulov jáne Elektrondyq deklaratsııalaý departamentiniń dırektory J. Dúısembıev bastap bardy.

Forým sheńberinde komıtet tóraǵasynyń orynbasary Koreıanyń keden qyzmetiniń komıssary ıÝn The Shıkpen kezdesti.

Kezdesý barysynda taraptar ózara is-qımyldyń ózekti máseleleri men keleshegin talqylady.

Q. Jumaǵulov Koreıa Respýblıkasy dástúrli túrde Qazaqstannyń negizgi saýda seriktesteriniń ondyǵyna kiretinin jáne ekijaqty taýar aınalymynyń serpini turaqty ósip otyrǵanyn atap ótti.

Taraptar kedendik ákimshilendirýdiń birqatar máseleleri boıynsha yntymaqtastyqty jandandyrý qajettigi týraly kelisti. Atap aıtqanda, qazaqstandyq tarap eksporttyq deklaratsııalardan alynǵan málimetter boıynsha aldyn ala aqparat almasý boıynsha ózara is-qımyl máselesin qaraýdy usyndy. Koreıa tarapy bul usynysty qoldap, Qazaqstan bastamasyn ilgeriletýge daıyn ekenin rastady.

Sondaı-aq Q. Jumaǵulov pen ıÝn The Shık keden isinde jańa aqparattyq sheshimderdi qoldaný, atap aıtqanda jasandy ıntellekt, mashınalyq oqytý jáne úlken derekterdi qoldaný máselelerinde tájirıbe almasýǵa daıyn ekendikterin rastady.



Jańalyqtar

MURAǴAT