Qazaqstan men Ázerbaıjan arasyndaǵy taýar aınalymy 3 eseden astam ósti
2022 jylǵy 6 shilde 00:23

Qazaqstan men Ázerbaıjan arasyndaǵy taýar aınalymy 3 eseden astam ósti

NUR-SULTAN. QazAqparat - Nur-sultanda Qazaqstan men Ázerbaıjan arasyndaǵy ekonomıkalyq yntymaqtastyq jónindegi Úkimetaralyq komıssııanyń 18-shi otyrysy ótti, dep habarlaıdy QazAqparat QR Saýda jáne ıntegratsııa mınnıstrliginiń baspasóz qyzmetine silteme jasap.

Úkimetaralyq komıssııanyń teń tóraǵalary Qazaqstan tarapynan Qazaqstan Respýblıkasy Premer – Mınıstriniń orynbasary - Saýda jáne ıntegratsııa mınıstri Baqyt Sultanov, Ázerbaıjan tarapynan Ázerbaıjan Respýblıkasynyń Energetıka mınıstri Parvız Shahbazov bolyp tabylady.

Otyrysqa Komıssııa músheleri jáne Qazaqstan Respýblıkasy men Ázerbaıjan Respýblıkasynyń mınıstrlikteri men vedomstvolarynyń ókilderi qatysty.

Taraptar saýda-ekonomıkalyq yntymaqtastyq, otyn-energetıka kesheni, kólik, aýyl sharýashylyǵy salalaryndaǵy ózara is-qımyl jáne ǵarysh salasy men aqparattyq-kommýnıkatsııalyq tehnologııalar salasyndaǵy yntymaqtastyq týraly keń aýqymdy máselelerdi talqylady.

Otyrys barysynda Premer-Mınıstrdiń orynbasary – Saýda jáne ıntegratsııa mınıstri Baqyt Sultanov Ázerbaıjan jalpy tarıhı tamyry, kópǵasyrlyq dostyq baılanystary jáne syndarly saıası dıalog baılanystyratyn Qazaqstannyń ońtústik Kavkazdaǵy árdaıym senimdi seriktesi bolǵanyn jáne bolyp qala beretinin atap ótti. Bıyl elder dıplomatııalyq qatynastardyń ornaǵanyna 30 jyl tolýyn atap ótýde.

«Osydan 30 jyl buryn bastalǵan jumys Ázerbaıjan Prezıdenti Ilham Geıdar-oglý men Qazaqstan prezıdenti Qasym-Jomart Kemelulynyń basshylyǵymen tabysty damyp keledi. Biz óz tarapymyzdan burynǵy tarıhı jáne mádenı baılanystarǵa negizdelgen Qazaqstan men Ázerbaıjan arasyndaǵy ekijaqty qarym - qatynastardyń dástúrli dostyq sıpatyn taǵy da atap ótemiz», - dedi Baqyt Sultanov.

Ótken jyly elder arasyndaǵy ózara saýda 3 ese ósip, $330 mln-nan asty, bıylǵy alǵashqy 5 aıdyń qorytyndysy boıynsha da ósim baıqalady, syrtqy taýar aınalymy $161,4 mln-dy qurap, 3 eseden astam ósti.

Qazirgi ýaqytta bıdaı, kúrish eksporty ósti, temirjol lokomotıvterin, jalpaq prokatty jetkizý ulǵaıdy. Ázerbaıjanǵa jańa qazaqstandyq taýarlar jetkizilimi paıda boldy. Bul relster, mıneraldy tyńaıtqyshtar.

Ázerbaıjan taýarlarynyń ımporty da ósýde. Qazaqstan júzý quraldary, qubyrlar, sorǵylar satyp ala bastady.

Baqyt Sultanov qazaqstandyq kompanııalar Ázerbaıjan naryǵyna ónerkásip jáne aýyl sharýashylyǵy taýarlaryn úzdiksiz eksporttaýdy jolǵa qoıýǵa múddeli ekenin atap ótti.

«Saýda jáne ıntegratsııa mınıstrligi eksporttyq akseleratsııa baǵdarlamasyn belsendi júzege asyrýda, ol eksporttaýshylardy eksportqa daıyndaý men súıemeldeýdi qarastyrady. Bıyl maqsatty naryq Ázirbaıjan bolyp tańdaldy. Hımııa, mashına jasaý, tamaq jáne jeńil ónerkásipti óndiretin 23 kompanııa ázerbaıjandyq seriktestermen kelissózderdiń belsendi kezeńine ótýde», – dedi vıtse-premer.

Óz kezeginde, Ázerbaıjannyń Energetıka mınıstri Parvız Shahbazov kelisý satysynda turǵan «Ázerbaıjan Respýblıkasy men Qazaqstan Respýblıkasy arasyndaǵy yntymaqtastyqty damytýdyń 2022-2026 jyldarǵa arnalǵan keshendi baǵdarlamasy» eki jaqty yntymaqtastyqty tereńdetý turǵysynan úlken mańyzǵa ıe jáne eki el arasyndaǵy dıalogty damytýdyń Jol kartasyna aınalatynyn atap ótti. Sondaı-aq qazaqstandyq ınvestorlardy Ázerbaıjandaǵy Alıat erkin ekonomıkalyq aımaǵynda qoljetimdi biregeı ınvestıtsııalyq múmkindikter men bıznesti júrgizýdiń tıimdi sharttaryn paıdalanýǵa shaqyrdy.

Sondaı-aq, otyrys barysynda qazaqstandyq tarap dástúrli baǵyttardy ózgertý máselesin kóterdi.

Baqyt Sultanovtyń aıtýynsha, Kaspıı óńiri Qazaqstan úshin jalǵyz teńiz qaqpasy bola otyryp, taýar aǵyndaryn qalyptastyrýda mańyzdy ról atqarady jáne Transkaspıı baǵyty men Soltústik-Ońtústik dálizi arqyly iri teńiz saýda jelilerine odan ári shyǵýdy qamtamasyz etedi. Osyǵan baılanysty Qazaqstan Úkimeti Aqtaý portynyń bazasynda konteınerlik hab salý jáne Dostyq – Moıynty ýchaskesinde ekinshi temirjol jelisin tartý jónindegi jobalardy iske asyrýǵa kiristi. Bul sharalar Qazaqstannyń tranzıttik áleýetin jáne THKB ótkizý qabiletin arttyrýǵa baǵyttalǵan.

«Qytaıdan/Ortalyq Azııa elderinen Eýropa elderine jáne keri qaraı júk aǵyndarynyń tranzıttik áleýetin tolyq kólemde ashý úshin porttardaǵy tehnıkalyq jáne tarıftik sharttardy ýaqtyly jańǵyrtýdy bastaý mańyzdy, bul barlyq saýda-ekonomıkalyq yntymaqtastyqtyń draıveri bolady», - dep atap ótti Baqyt Sultanov.

Otyrys sheńberinde Bakýde ótken úkimetaralyq komıssııanyń 17-shi otyrysynan keıingi atqarylǵan jumystar qaraldy. Sondaı-aq, komıssııa otyrysynyń hattamalyq jobasy aıasynda barlyǵy 14 másele talqylandy.

Kezdesý sońynda Ázerbaıjan Respýblıkasy men Qazaqstan Respýblıkasy arasyndaǵy saýda-ekonomıkalyq yntymaqtastyq jónindegi birlesken úkimetaralyq komıssııanyń 18-shi otyrysynyń qorytyndysy boıynsha Hattamaǵa qol qoıyldy. Kelesi jyly Bakýde komıssııanyń 19-shy otyrysyn ótkizý týraly ýaǵdalastyqqa qol jetkizildi.

Uqsas jańalyqtar
Seriktester jańalyqtary

Jańalyqtar

Úrdis

MURAǴAT