Qazaqstan-Lıýksembýrg dıplomatııalyq qatynasynyń ornaǵanyna 30 jyl toldy
2022 jylǵy 2 shilde 12:02

Qazaqstan-Lıýksembýrg dıplomatııalyq qatynasynyń ornaǵanyna 30 jyl toldy

BRıÝSSELЬ. QazAqparat. 2022 jylǵy 29 maýsymda Qazaqstan Respýblıkasy men Lıýksembýrg Uly Gertsogtigi ekijaqty qarym-qatynastardyń mańyzdy sımvoldyq kúni – eki el arasyndaǵy dıplomatııalyq qatynastardyń ornaǵanyna 30 jyl tolýyn atap ótýde, dep habarlaıdy QazAqparat tilshisi.

Ótken úsh onjyldyqta Nur-Sultan men Lıýksembýrg arasynda ózara qurmetke, senimge jáne ózara tıimdi yntymaqtastyqqa negizdelgen berik te syndarly qatynas ornady. Osynaý áriptestik zań ústemdigi, beıbitshilikke járdemdesý, adam quqyqtaryn qorǵaý jáne demokratııalyq ınstıtýttardy nyǵaıtý sııaqty ortaq qundylyqtar men qaǵıdattarǵa negizdeldi. Lıýksembýrg Premer-Mınıstri Ksave Bettel myrzanyń 2015 jáne 2017 jyldary Qazaqstanǵa jasaǵan saparlaryn qosa alǵandaǵy osy kezeń ishinde ótkizilgen saıası kezdesýler ózekti halyqaralyq máseleler boıynsha yntymaqtastyqty nyǵaıtý men keńeıtýge jáne ustanymdardy úılestirýge ekijaqty formatta da, kópjaqty forýmdarda da eleýli dárejede yqpal etti.

Qazaqstan men Lıýksembýrg parlamentterinde qurylǵan «dostyq toptary» ekijaqty seriktestigimizde mańyzdy rólge ıe. Parlamentaralyq dıalog pen saparlar ekijaqty jáne kópjaqty, onyń ishinde EQYU Parlamenttik assambleıasy qyzmeti sheńberindegi, sondaı-aq «Qazaqstan – Eýropa keńesiniń parlamenttik assambleıasy» formatyndaǵy yntymaqtastyqty nyǵaıtty.

Qazaqstan men Lıýksembýrg arasyndaǵy baılanystardyń keńeıýi saýda jáne ınvestıtsııalyq múmkindikterdiń, sondaı-aq ǵylymı-tehnıkalyq áriptestiktiń odan ári ósýine yqpal etedi. Qazaqstandaǵy «Benılıýks» saýda palatasy men qurmetti konsýldar ınstıtýtynyń qyzmeti ekonomıkalyq yntymaqtastyqty arttyrý men zamanýı ózekti máselelerdi sheshýge baǵyttalǵan. Taraptar Lıýksembýrg álemdik kóshbasshylardyń biri bolyp tanylatyn qarjy, joǵary tehnologııalar, ǵarysh ónerkásibi, tsıfrlandyrý salalaryndaǵy ekonomıkalyq yntymaqtastyqqa, sondaı-aq turaqty jáne «jasyl» damý salasyndaǵy yntymaqtastyqqa basa nazar aýdarady.

Taraptar qos memlekettiń mádenı jáne bilim berýdegi baılanystaryn keńeıtý úshin eleýli kúsh-jiger jumsaýda. 2020 jyly Lıýksembýrgte qazaq halqynyń oıshyly, uly aqyn Abaıdyń 175 jyldyǵyna arnalǵan is-sharalar ótti.

Dıplomatııalyq qatynastardyń 30 jyldyǵyn atap ótý aıasynda taraptar Qazaq-lıýksembýrg qarym-qatynastaryn senimdi dıalog pen áriptestik rýhynda nyǵaıtýǵa bar kúsh-jigerin salýǵa nıetti bolyp qala bermek.


Sýret: facebook.com/KazakhstanInBrussels


Jańalyqtar

Úrdis

MURAǴAT