+7 (701) 759 90 19
USD 425.02 EUR 498.17
RUB 5.85 CNY 65.85
Jańalyqtar

Qazaqstan komandalary Olımpıada oıyndarynda qalaı kıindi

2021 jylǵy 23 shilde 08:35
Bólisińiz:
Qazaqstan komandalary Olımpıada oıyndarynda qalaı kıindi

NUR-SULTAN. QazAqparat – Búgin Japonııa astanasyndaǵy XXXII jazǵy Olımpıada saltanatty túrde ashylady. Qazaqstan bul dúbirli dodaǵa 1996 jyldan beri qatysyp keledi jáne úzdik nátıjemen qatar sán-saltanatty formasymen de kózge tústi. Osy oraıda QazAqparat agenttigi 1996 jyldan beri Qazaqstan quramalarynyń Olımpıada ashylýyna kıgen saltanatty formalaryna sholý usynady.

Uqsas jańalyqtar
Golovkın kúzge josparlanǵan aıqasynan aıyrylyp qaldy Fýtzaldan álem chempıonaty: Qazaqstan shırek fınalǵa joldama aldy Tennıs: ıÝlııa Pýtıntseva Ostrava týrnırinde jeńilip qaldy

Aıta keteıik, 1988 jylǵa deıin qazaq sportshylary KSRO quramasynyń qatarynda óner kórsetti. Al 1992 jylǵy Jazǵy Olımpıada oıyndarynda elimiz táýelsizdigin jarııalaǵanymen, sportshylarymyz Birikken komanda quramyna endi. Qazaqstan 1996 jyly AQSh-tyń Atlanta qalasyndaǵy jazǵy Olımpıadaǵa táýelsiz el retinde qatysty.


Atlanta oıyndary týraly ǵalamtorda kóp sýret saqtalmaǵan. Munda Halyqaralyq olımpıada komıtetiniń YouTube-tegi resmı kanaly kómekke keldi. Bul oıynda Qazaqstan quramasy týymyz tárizdi kógildir tústi kostıým kıgen. Qazaqstandyq sportshy áıelder aq jeıde, kók taspasy bar aq qalpaq, aq aıaq kıim jáne altyn túımeli kók kostıým kıgen. Al erler – sary taspasy bar aq qalpaq, altyn tústi galstýk, aq jeıde men aq shalbar, aq týflı jáne kók pıdjak kıdi. Sondaı-aq, erlerdiń sol jaq keýdesinen týymyzdaǵy kún men qyran qusty baıqaýǵa bolady.

Bul Olımpıadada qazaqstandyq 94 sportshy sporttyń 15 túrine qatysty. Nátıjesinde 11 medal – 3 altyn, 4 kúmis, 4 qola jeńip aldy. Osylaısha Qazaqstan ózi qatysqan alǵashqy Olımpıadasynda 197 el arasynda 24-orynǵa turaqtady. 81 kelige deıingi salmaqta judyryqtasqan boksshy Vasılıı Jırov Vel Barker kýbogyna qol jetkizgen alǵashqy qazaqstandyq atandy. ıÝrıı Melnıchenko grek-rım kúresinen 57 keli salmaqta jáne Aleksandr Parygın bessaıystan top jaryp, «altyn» aldy. Boksshy Bolat Jumadilovke (51 kelige deıin salmaqta), nysana kózdeýden Sergeı Belıaevke (eki dúrkin «kúmis» júldegeri), aýyr atlet Anatolıı Hrapatyıǵa «kúmis» buıyrdy. Al «qola» medalin bylǵary qolǵap sheberleri Bolat Nııazymbetov pen Ermahan Ybraıymov jáne nysana kózdeýden Vladımır Vohmıanın men erkin kúresten Máýlen Mamyrov aldy.

Tórt jyldan keıin 2000 jylǵy jazǵy Olımpıada Aýstrlııanyń Sıdneı qalasynda ótti. Oǵan 130 qazaqstandyq sporttyń 18 túri boıynsha qatysty. Munda da sportshylarymyzdyń saltanatty kıimi asa ózgere qoımaǵanyn baıqaımyz. Tek áıelder beldemsheniń ornyna erlermen birdeı kógildir pıdjak pen qońyr sarǵysh shalbar kıgen. Jáne áıelderdiń jeıdesine qazaqtyń túıetaban oıýy salynǵan. Al erlerde – tik jaǵaly qońyr-sarǵysh jeıde, bul joly erler galstýk taqpady. Barlyq sportshynyń sol jaq keýdesinde Qazaqstannyń týy beınelengen.

Bul dodada Qazaqstan 7 medal ǵana jeńip aldy. Biraq, 3 altyn jáne 4 kúmis alǵandyqtan, elimiz 199 memleket arasynan 22-orynǵa kóterildi. Dál osy Olımpıadada Bekzat Sattarhanov, Ermahan Ybraıymov jáne Olga Shıshıgına Qazaqstan qanjyǵasyna «altyn» ákelip, el jadynda qaldy. Odan bólek, «kúmis» alǵan boksshylar Bolat Jumadilov pen Muhtarhan Dildábekov jáne erkin kúresten Islam Baıramýkov pen veloshabandoz Aleksandr Vınokýrov ta Qazaqstannyń tanymal sportshylary atandy.

2004 jylǵy dástúrli doda Olımpıada otany – Grekııada uıymdastyryldy. Oǵan Qazaqstannyń 119 sportshysy barǵan edi. Munda da kıim jaǵynan ózgerister bolmady. Sol qalpaq, sol kostıým, sol oıý-órnek. Tek áıelder shalbardyń ornyna kúńgirt kók tústi kóılek kıdi. Erlerdiń moınynan kók, sary, súr túster aralsqan galstýkty kórýge bolady. Sosyn keýdedegi emblema týdaǵy kún men qyrannyń ornyna eltańbaǵa aýystyryldy jáne sportshylardyń qolyna jalaýshalar berildi. Bul formany semeılik «Azııa» fırmasy ázirlegen.

Nátıjesi jaǵynan da Afına oıyndary kóńil kónshitpedi. Kemi 3 «altynmen» qaıtatyn Qazaqstan bul joly jalǵyz «altyndy» mise tutty. Ony 69 keli salmaqtaǵy boksshy Baqtııar Artaev syılady. Sondaı-aq B. Artaev Olımpıada chempıony ataǵymen qosa, Vel Barker kýbogyn da jeńip aldy. Osylaısha Vel Barker kýbogyn ıelengen ekinshi qazaqstandyq boksshy atandy. Odan bólek, tanymal boksshy Gennadıı Golovkın, aýyr atlet Sergeı Fılımonov, balýandar Georgıı Tsýrtsýmıa jáne Gennadıı Lalıev «kúmis» júldeger atandy. Al jeńil atlet Dmıtrıı Karpov, boksshy Serik Eleýov jáne grek-rım kúresinen Mhıtar Manýkıan qola aldy. Nátıjesinde Qazaqstan segiz medal alyp, «altyn» sany az bolǵandyqtan, 201 eldiń arasynda 40-orynǵa bir-aq syrǵydy.

2008 jylǵy Olımpıada alaýy Qytaı astanasy Beıjińde tutandy. Bul joly Qazaqstan quramasyn kıindirý tanymal dızaıner, stılıst Quralaı Nurqadilovaǵa júkteldi jáne sportshylardyń saltanatty formasy túbegeıli ózgerdi. Dástúrli kók tústiń reńkteri qyzǵylt sary men sur tústerge aýysty jáne lentalar sekildi elementter kóbeıdi. Áıelder qyzǵylt sary qalpaq pen beldemshe, aq jeıde men aq pıdjak kıdi. Erler aq qalpaq, aq jeıde men aq pıdjak jáne sur shalbarmen shyqty jáne olardyń kók galstýgynda Qazaqstan týyndaǵy kún men qyran qus beınelengen. Barlyq sportshylardan «KAZAKHSTAN» lentasy men eltańba emblemasyn kórýge bolady.

Beıjińge Qazaqstannan 115 adam sporttyń 20 túrinen saıysqa tústi jáne 203 el arasynda 29-orynǵa taban tiregen edi. 2 qazaqstandyq «altyn» alyp, jeńis tuǵyryna shyqqan edi. Onyń biri 69 keli salmaqtaǵy boksshy Baqyt Sársekbaev bolsa, ekinshisi – aýyr atletıkadan 94 keli salmaqta synǵa túsken Ilıa Ilın bolatyn. Alaıda, keıinirek I. Ilınniń jeńisin Halyqaralyq olımpıada komıteti dopıng qoldandy dep qaıtaryp aldy. Al «kúmis» júlde alǵan aýyr atlet Alla Vajenınanyń qarsylasy dopıng daýyna iligip, qazaqstandyq sportshyǵa «altyn» berildi.

Kúmis medaldi dzıýdoshy Ashat Jitkeev, jeńil atlet Olga Rypakova jáne grek-rım kúresiniń balýany Nurbaqyt Teńizbaev jeńip aldy. Bastapqyda ekeýi de qola júldeger bolǵan, keıinnen qarsylastarynyń dopıng qoldanǵandary belgili bolyp, kúmiske ıe boldy. Grek-rım kúresiniń balýany Elena Shalygına, erkin kúresten Marıd Mýtalımov, boksshy Erkebulan Shynalıev jáne taekvondoshy Arman Shilmanov qola júlde enshiledi. Sondaı-aq, dopıng tekserýinen keıin qazaqstandyq kúresshi Taımýraz Tıgıev pen aýyr atlet Irına Ekrasovanyń «kúmis» júldesi, aýyr atlet Marııa Grabovetskaıa men kúresshi Áset Mámbetovtyń «qola» júldesi kúshin joıdy.

2012 jyly Londonda ótken Olımpıada oıyndarynda da sportshylardyń saltanatty kıimin Quralaı Nurqadilova ázirledi. Bul joly dástúrli qalpaqtar kepkaǵa, baısaldy pıdjaktar jeńil kúrteshege aýysty. Beıjiń Olımpıadasyndaǵy jalpaq lentalar qaıtalanbady. Sporshy erler aq bas kıim men kúrteshe, kógildir tústi qysqa jeńdi jeıde jáne shalbar kıip, beldik pen kók-sary galstýk taqqan. Áıelder sporttyq stıldegi kógildir kóılek kıip, kók-sary shıfon oramal baılaǵan, juqa tor qolǵap kıgen. Aıaq kıimder bir dızaında, tek áıelderde azdaǵan ókshe qosylǵan. Barlyq kúnqaǵarlar men kúrtelerde usaq shrıftimen «KAZAKHSTAN» jazýy jazylǵan.

London olımpıadasynda qazaqstandyq qatysýshylar sporttyń 25 túrine qatysyp, 7 «altyn» jeńip alyp, buryn-sońdy bolmaǵan nátıje kórsetken edi. Biraq Halyqaralyq olımpıada komıteti taǵy da dopıng daýymen 4 sportshymyzdy medalinen aıyrdy. 7 chempıonnyń úsheýi ǵana óz kórsetkishterin saqtap qaldy. Olar: veloshabandoz Aleksandr Vınokýrov, úsh qarǵyp sekirý saıysynan Olga Rypakova jáne dańqty boksshy Serik Sápıev. Serik Sápıev chempıondyq ataqpen birge Vel Barker kýbogyna ıe bolǵan úshinshi qazaqstandyq sportshy boldy. Al aýyr atletter – Ilıa Ilın, Zúlfııa Chınshanlo, Maııa Maneza jáne Svetlana Podobedovalardyń kórsetkishteri joıyldy. London oıyndaryndaǵy jalǵyz «kúmis» júlde boksshy Ádilbek Nııazymbetovtyń qanjyǵasyna baılandy, al kúresshiler Aqjúrek Tańatarov, Gúzel Manıýrova jáne Danııal Gadjıev, boksshylar Ivan Dychko men Marına Volnova «qola» júldeger atandy.

Al sońǵy Rıo-de-Janeıro qalasynda ótken HHHІ jazǵy olımpıadada Qazaqstan quramasynyń saltanatty kıimin «KazSPO - N» kompanııasy ázirledi jáne tanymal dızaıner Aıda Qaýmenova atsalysty. Munda aq jáne kúńgirt kók tústerge basymdyq berilgen. Áıelder aq tústi kımono, kúńgirt kók beldemshe jáne sary oramalmen shyqty. Kımononyń jaǵasy men qaltasyna qazaqtyń ulttyq oıýy salynǵan jáne keýdesine eltańba emblemasy bekitilgen. Erlerde kerisinshe kók pıdjak, aq shalbar jáne qońyr beldik pen sary galstýk taǵylǵan. Bul joly sportshylarda eshqandaı bas kıim bolmady.

Ázirge Rıo oıyndary el sporty tarıhynda kúmis jáne jalpy júldeler sanynan rekordtyq kórsetkishte. Oǵan 26 sport túrinen 104 sportshy qatysyp, jalpy sany 17 medal (3 altyn, 5 kúmis, 9 qola) alǵan edi. «Altyn» medaldi aýyr atlet Nıjat Rahımov, júzýshi Dmıtrıı Balandın jáne boksshy Danııar Eleýsinov jeńip aldy. Al dzıýdoshy Eldos Smetov, erkin kúresten Gúzel Manıýrova, aýyr atlet Jazıra Japarqul jáne boksshylar Ádilbek Nııazymbetov pen Vasılıı Levıt «kúmis» júldeger atandy. Bul jyly «Qola» júlde alǵandar kóp: Otgontsetseg Galbadrah (dzıýdo), Ivan Dychko, Darıǵa Shákimova (boks), Aleksandr Zaıchıkov, Farhad Harkı, Karına Gorıcheva (aýyr atletıka), Olga Rypakova (jeńil atletıka), Elmıra Syzdyqova, Ekaterına Larıonova (erkin kúres).

2020 jylǵy Tokıodaǵy jazǵy Olımpıada oıyndary koronavırýs pandemııasyna baılanysty 2021 jyldyń jazyna aýystyryldy. «Salta» brendimen tanymal Saltanat Baımuhamedova olımpıadalyq kıimniń saltanatty formasynyń dızaıneri boldy. Saltanatty forma «kejýal» nemese «sport-shık» formatynda jasalǵan. Bul kıimderge kútim jasaý ońaı, myjylmaıdy jáne allergııa týdyrmaıdy. Sportshylar sporttyq fýtbolka men jaǵasynda aq jolaǵy bar qoıý kók pıdjak, keń shalbar men aq krossovka kıgen. Pıdjakta Tokıo Olımpıadasy men Qazaqstannyń ulttyq olımpıada komıtetiniń belgileri japsyrylǵan. Oń jaq jeńinde Qazaqstannyń týy beınelengen. Ázirge bas kıim men ózge de aksessýarlar kórinbeıdi.

Qazaqstan quramasynyń saltanatty formasy tanymal Forbes jýrnalynyń úzdik ýnıformalar reıtıngine enip úlgerdi. Úzdik formalar tizimine #teamKZ atletterinen bólek, AQSh, Lıberııa, Reseı, Chehııa, Qytaı, Ońtústik Afrıka jáne Japonııa komandalarynyń formasy engen. Qazaqstan komandasynyń formasyn sıpattaı kele, avtor tústerdiń jaqsy úılesim tapqanyna, eń bastysy – jobadaǵy komandalyq jumystyń joǵary bolǵanyna erekshe nazar aýdarady. Óıtkeni, formany daıyndaý barysyna sportshylar da qatysqan bolatyn.


Búgin Olımpıadanyń ashylý saltanaty ótedi. Qazaqstan quramasynda sporttyń 28 túrinen 97 Olımpıada joldamasy bar. Aldyńǵy Olımpıadalarda júlde alǵan Olga Rypakova, Dmıtrıı Balandın, Eldos Smetov, Galbadrah Otgontsetseg syndy sportshylar osy joly da baq synaıdy. Sportshylarymyzǵa sáttilik pen jeńisti kúnder tileımiz!






Bizdiń kanalymyzǵa jazylyńyz:

Bólisińiz:

Avtor:

Aıjan Serikjanqyzy

Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Aıdar Ospanalıev
Aıdar Ospanalıev
954-059

MURAǴAT