«Qazaqstan halqyna» qorynyń 4 quryltaıshysy bar
2022 jylǵy 19 qańtar 11:11

«Qazaqstan halqyna» qorynyń 4 quryltaıshysy bar

NUR-SULTAN. QazAqparat – «Qazaqstan halqyna» qaıyrymdylyq qorynyń negizin qalaýshylar kimder? Jáne qor quryltaıshylarynyń qandaı quqyǵy bar? Atalǵan suraqtarǵa qor tóraǵasy Bolat Jámishev jaýap berdi, dep habarlaıdy QazAqparat tilshisi.

«Birneshe qoǵamdyq birlestik birigip «Qazaqstan halqyna» qorynyń quryltaıshysy bolyp otyr. Atap aıtqanda 4 qoǵamdyq uıym. Nege ol 4 uıym degen suraqtar da qoıylyp jatyr. Atalǵan uıymdar osyǵan deıin de memlekettik organdarmen birlesip, densaýlyq saqtaý, bilim jáne áleýmettik salada qaıyrymdylyq sharasymen turaqty aınalysyp keledi. Jáne sol 4 qoǵamdyq uıym joǵaryda atalǵan sala mınıstrlikteriniń usynysymen tańdaldy. Osy tusta erekshe aıtyp ótkim keledi, quryltaıshylardyń qatysýshylar sekildi quqyǵy joq. Olarǵa arnaıy quqyq berilmeıdi. Olar tek qor jumysynyń bastalýyna serpin berdi, qaıyrymdylyqty alǵashqy bolyp bastady. Qor az ýaqyttyń ishinde quryldy, sondyqtan osyndaı sheshim qabyldandy» - dedi Bolat Jámishev Habar 24 arnasynyń «Oshakbaev LIVE» baǵdarlamasynyń efırinde.

Onyń aıtýynsha, kez kelgen qoǵamdyq uıym qor qatysýshysy bola alady. Basty talap - qaıyrymdylyq salasynda tájirıbeniń bolýy.

«Qor jumysyna úles qosamyn degen qoǵamdyq uıymdar men birlestikterge esigimiz ashyq. Qor - bireýdiń jekemenshigi emes, halyqtiki jáne halyq úshin qyzmet etedi», - deıdi ol.


Jańalyqtar

MURAǴAT