«Qazaqstan halqyna» qory sal bolyp qalǵan balalarǵa ekzoskelet satyp áperedi
2022 jylǵy 16 mamyr 15:11

«Qazaqstan halqyna» qory sal bolyp qalǵan balalarǵa ekzoskelet satyp áperedi

NUR-SULTAN. QazAqparat - «Qazaqstan halqyna» qory tirek-qozǵalys apparatynda aqaýy bar balalardy robottandyrylǵan qurylǵylarmen (ekzoskelet) qamtamasyz etý boıynsha qaıyrymdylyq baǵdarlamasyn iske qosty, dep habarlaıdy QazAqparat.

Baǵdarlama balalarǵa tıimdi ońaltý, osy dıagnozdarmen qatar paıda bolatyn aýrýlardyń damý qaýpin azaıtý, fızıkalyq jáne psıho-emotsıonaldyq ál-aýqatyn jaqsartý múmkindigin beredi. Bul balalardyń qoǵamda áleýmettenýi úshin óte mańyzdy.

Tehnıkalyq ońaltý quraldaryn, onyń ishinde ekzoskeletterdi balalary úshin qajet etetin ata-analardan 300-den astam ótinish kelip tústi.

Baǵdarlama aıasynda jyl sońyna deıin 13 ekzoskelet shyǵarý josparlansa, onyń 4-eýi boıynsha ólsheý júrgizilip, óndiris protsesi iske qosyldy.

Ekzoskelet – tserebraldy sal aýrýy, mı jaraqaty, julyn jaraqattary, paraplegııa, bulshyqet dıstrofııasy, Rett sındromy jáne basqa da aýrýlarmen aýyratyn balalardyń óz betinshe qozǵalýyna kómektesetin zamanaýı, joǵary tehnologııalyq jáne tıimdi ońaltý quraly.


Aıta ketý kerek, árbir ekzoskelet bala úshin onyń parametrlerin eskere otyryp, jeke ázirlenedi, bul eń birinshi qoldanýdaǵy tıimdilik pen paıdalanýdaǵy qarapaıymdylyqty arttyrady.

Bir ekzoskelettiń salmaǵy - 25 keli.

Balalardy ońaltý ulttyq ortalyǵynyń bazasynda naýqastyń ekzoskeletiniń qajettiligi týraly qorytyndy shyǵaratyn kóp beıindi top quryldy.

Qor «Qazaqstannyń 100 jańa tulǵasy» jobasynyń jeńimpazy Máýlen Bekturǵanov negizin qalaǵan ekzoskeletterdi shyǵaratyn otandyq «MBionics» JShS-men kelisim-shartqa otyrdy.

Ońaltý jospary mekemeleriniń jumys úlgilerin jobalaý Astana qalasynyń Medıtsına ýnıversıtetimen tyǵyz baılanysta júzege asyrylady.

13 balany ekzoskeletpen qamtamasyz etý úshin «Qazaqstan halqyna» qory 117 mıllıon teńge bólip otyr.


Seriktester jańalyqtary

Jańalyqtar

Úrdis

MURAǴAT