«Qazaqstan halqyna» qory bastamalary onlaın qoljetimdi bolady

NUR-SULTAN. QazAqparat – «Qazaqstan halqyna» qory bastamalary onlaın qoljetimdi bolady, dep habarlaıdy QazAqparat tilshisi.

Almatyapat Telegram-kanalynda jarııalanǵan aqparatqa qaraǵanda, «Qazaqstan halqyna» qorynyń tóraǵasy Bolat Jámishev «Ulttyq múdde» telejobasyna bergen suhbatynda qor men qoǵamdastyqtyń ózara is-qımyl tetikterin jan-jaqty tarqata aıtyp berdi.

Onyń atap ótýinshe, taıaý ýaqytta qordan birinshi bolyp kómek alatyn jobalar men adamdardyń tizimi halyqqa jarııa etiletin bolady.

«Bastama paıda bolǵan alańdar boıynsha – halyq bizdiń durys istep jatqanymyzǵa nemese basqa sheshim qabyldaý qajettigimizge qatysty óz oılaryn bildirsin. Biz mundaı usynystarǵa sózsiz qulaq asatyn bolamyz», - dedi Bolat Jámishev.

Esterińizge sala keteıik, Memleket basshysy Qasym-Jomart Toqaevtyń tapsyrmasy boıynsha «Qazaqstan halqyna» qoǵamdyq áleýmettik qory (QÁQ) quryldy.

Búginge deıin qorǵa 52 mıllıard teńgeden astam qarjy tústi. Qor jylyna keminde 100 mlrd teńge kóleminde aqsha qarajatyn shoǵyrlandyrady dep josparlanýda.