Qazaqstan halqyna qory balalardyń shetelde emdelýine kómek kórsetýde
2022 jylǵy 14 sáýir 17:58

Qazaqstan halqyna qory balalardyń shetelde emdelýine kómek kórsetýde

NUR-SULTAN. QazAqparat – Qazaqstan halqyna qory júrek aqaýynyń óte aýyr dıagnozymen týǵan Musa esimdi balanyń Ońtústik Koreıaǵa medıtsınalyq avıatasymaldaý aqysyn tólep berdi, dep habarlaıdy QazAqparat tilshisi.

Bul týraly qordyń baspasóz qyzmeti málimet taratty.

«Qor kishkentaı Musanyń Ońtústik Koreıaǵa medıtsınalyq avıatasymaldaý aqysyn tólep berdi. Balaqaıdyń týa bitken júrek aqaýynyń óte aýyr túri dıagnozy bar. Alty aılyq Musa Sultashev ata-anasymen birge Atyraý oblysynan Koreıanyń Seýl qalasyndaǵy INCHEON SEJONG HOSPITAL medıtsınalyq mekemesine tikeleı arnaıy reıspen ushty», - dep jazylǵan uıymnyń baspasóz habarlamasynda.

Musanyń shetelde emdelý aqysyn ózge qaıyrymdylyq uıym tolyǵymen ótep bergen. Sondyqtan onyń ata-anasy «Qazaqstan halqyna» qoryna medıtsınalyq transporttaý aqysyn tóleýge ótinish bildirgen bolatyn.

«Ushaqpen sapar 12 saǵatqa sozyldy, ońaı bolǵan joq, biraq bizdiń kishkentaı batyr shydamdy boldy. Endi emdi bastaımyz», - deıdi balanyń ákesi Jalǵas Sultashev.

Sondaı-aq qor Batys Qazaqstan oblysy, Aqsaı qalasynyń turǵynyna kishkentaı turǵynyna Reseıdiń Máskeý qalasyndaǵy V.I. Kýlakov atyndaǵy «Akýsherlik, gınekologııa jáne perınatologııa ulttyq medıtsınalyq ǵylymı ortalyǵynda» jasalatyn otanyń aqysyn tólep beretin boldy.

«Quzyretti organnyń medıtsınalyq qorytyndysyn zerdelegen Saraptamalyq komıssııanyń usynymy boıynsha qor naýqastyń ekinshi otasyn emdeý kýrsyn tóleý týraly sheshim qabyldady. Qazir qyz bala ata-anasymen birge aýyr ota jasatý úshin saparǵa daıyndalýda. Kishkentaı qazaqstandyqtardyń ómirin saqtap qalý úshin qordan 52 mıllıon teńge bólindi», - dep jazylǵan qordyń aqparatynda.

Eske salsaq, «Qazaqstan halqyna» qory arqyly álemdegi eń qymbat dárini kimder alǵany aıtylǵan bolatyn.


Jańalyqtar

Úrdis

MURAǴAT