Qazaqstan halqyna qory aýyr dertke shaldyqqan balalarǵa kómek kórsetedi
2022 jylǵy 13 sáýir 16:50

Qazaqstan halqyna qory aýyr dertke shaldyqqan balalarǵa kómek kórsetedi

NUR-SULTAN. QazAqparat – Elimizde bulshyqet atrofııasy (SMA) jáne Dıýshen sındromy bar 22 adamǵa kómek kórsetiledi. Bul týraly «Qazaqstan halqyna» qoǵamdyq qory tóraǵasynyń orynbasary Lázzat Shyńǵysbaeva aıtty, dep habarlaıdy QazAqparat tilshisi.

«Bulshyqet atrofııasy (SMA) jáne Dıýshen sındromy bar 20 bala men 2 eresek adamǵa dári-dármek satyp alýǵa arnalǵan kelisimshart qol qoıý kezeńinde», - dedi L. Shyńǵysbaeva Ortalyq kommýnıkatsııalar qyzmetinde.

Taratylǵan málimetke qaraǵanda, jaqyn arada Mýkovıstsıdoz dıagnozy qoıylǵan 16 balaǵa dári-dármek satyp alýǵa qarjylandyrý júrgiziledi.

Munymen qosa, julyn bulshyqetteriniń atrofııasy bar 4 balaǵa Qazaqstanda tirkelmegen qymbat turatyn Onasemnogen abeparvovec (Zolgensma) preparatyn satyp alý týraly sheshim qabyldandy. Aıta keteıik, qazir tórt naýqasqa da dári-dármek berildi.

Lázzat Shyńǵysbaevanyń aıtýynsha, Máskeý qalasynda BQO turǵynyn hırýrgııalyq emdeýdi uıymdastyrýǵa qaıyrymdylyq kómek jáne Atyraý oblysynan týa bitken júrek aqaýynyń asa aýyr túrimen aýyratyn balany Koreıanyń Seýl qalasyndaǵy medıtsınalyq mekemege jetkizýge kómek kórsetildi.

Qaıyrymdylyq kómek kórsetýdi jalǵastyra otyryp, Qor kelesi baǵyttar boıynsha jobalar men baǵdarlamalardy júzege asyrýǵa kirisedi. Densaýlyq saqtaý salasynda:

- Orfandyq dertke shaldyqqan naýqastardy dári-dármekpen qamtamasyz etý jobasy;

- medıtsınalyq uıymdardy oftalmologııalyq, aýdıologııalyq skrınıngter men aýrýlardy erte dıagnostıkalaý úshin jabdyqtarmen qamtamasyz etý baǵdarlamalary;

- Aǵzalar men tinderdi transplantatsııalaýǵa, onkologııalyq jáne onkogematologııalyq patologııalarǵa muqtaj naýqastarǵa qaıyrymdylyq kómek kórsetý jobalary;

- múgedekterdi (balalar men eresekterdi), atap aıtqanda, bıonıkalyq protezderi barlardy ońaltý úshin tehnıkalyq quraldarmen qamtamasyz etý baǵdarlamalary.

Budan buryn habarlanǵandaı, qańtar oqıǵasynda qaza bolǵan 13 adamnyń týystaryna qordan qarajat aýdarylmaq.


Seriktester jańalyqtary

Jańalyqtar

Úrdis

MURAǴAT