Jańalyqtar  >
  Sport
Qazaqstan fýtbolynyń ańyzdary men «Super Bol!» arasyndaǵy match: Esep 4:4
2022 jylǵy 7 tamyz 22:10

Qazaqstan fýtbolynyń ańyzdary men «Super Bol!» arasyndaǵy match: Esep 4:4

ALMATY. QazAqparat – Almatynyń Ortalyq stadıonynda «Super bol» realıtı-shoýynyń qatysýshylary men elimiz quramasy sapynda oınaǵan, esimderi ańyzǵa aınalǵan fýtbolshylar joldastyq match ótkizdi, dep habarlaıdy QazAqparat tilshisi.

Aıta ketsek, «Super Bol!» jas fýtbolshylar jobasyn QR Prezıdenti janyndaǵy «Dara» daryndylardy qoldaý qory jáne Freedom Broker ınvestıtsııalyq kompanııasy qolǵa alǵan.

Jas fýtbolshylardy irikteý jobasy Semeı qalasynda bastaldy. Odan keıin Pavlodar, Aqtóbe, Aqtaý, Shymkent, Taraz, Nur-Sultan, Almaty qalalarynda jalǵasyn tapty. Atalǵan joba 16-25 jas aralyǵyndaǵy jastardyń óz sheberligin kórsetýge múmkindik jasady. Olardyń arasynan 50-den astam jas iriktelip, bolashaqta kásibı komandalar qatarynda oınaýǵa jol ashylmaq.

Búgin Qazaqstan quramasy atynan alańǵa Samat Smaqov, Davıd Lorııa, Nurbol Jumasqalıev, Andreı Karpovıch, Dmıtrıı Bıakov, Qaırat Áshirbekov, Maksım Jalmagambetov, Rýslan Baltıev, Alı Alıev, Edýard Sergıenko, Murat Tileshev, Sergeı Boıchenko, Baýyrjan Islamhan shyqty. Sondaı-aq joldastyq kezdesýge kezinde Ispanııanyń «Real Madrıd», Italııanyń «Inter» klýbtarynda jáne Argentına quramasynda dop tepken Esteban Kambıasso arnaıy shaqyrtyldy. Ol ulttyq qurama qatarynda jasyl alańǵa shyqty.

Fýtbol ańyzdary komandasyna nıderland mamany Arno Paıpers jetekshilik etti. Al «Super bol» realıtı-shoýynyń qatysýshylaryna belgili fýtbol mamany Talǵat Baısýfınov bapkerlik jasady.

«Super bol» fýtbolshylary oıyndy belsendi bastady. Birinshi kezeńde olar qatarynan tórt gol soǵyp ketti. Oǵan ekinshi kezeńde elimizdiń ulttyq quramasy ańyzdarynan Nurbol Jumasqalıev, Baýyrjan Islamhan, Murat Tileshev, Qaırat Áshirbekov tórt golmen jaýap qaıyrdy.

Osylaısha komandalar 4:4 esebine qanaǵat bildirdi.

Buǵan deıin habarlaǵanymyzdaı, joldastyq kezdesýden túsken qarjy qaıyrymdylyq maqsatqa jumsalady.




Uqsas jańalyqtar
Seriktester jańalyqtary

Jańalyqtar

Úrdis

MURAǴAT