Qazaqstan eksportynyń 51 paıyzyn shıki munaı men munaı ónimderi qurap otyr
2021 jylǵy 24 qarasha 15:53

Qazaqstan eksportynyń 51 paıyzyn shıki munaı men munaı ónimderi qurap otyr

NUR-SULTAN. QazAqparat – Qazaqstan eksportynyń 51 paıyzyn shıki munaı men munaı ónimderi qurap otyr. Bul týraly QR Parlamenti Senaty tóraǵasynyń orynbasary Nurlan Ábdirov aıtty, dep habarlaıdy QazAqparat tilshisi.

«Memleket eksportqa baǵdarlanǵan kásiporyndarǵa 20-ǵa jýyq qarjylyq jáne qarjylyq emes qoldaý is-sharalaryn kórsetýde. Іshki naryqty otandyq taýarlarmen molyqtyrý jáne bizdiń taýar óndirýshilerimiz úshin qolaıly jaǵdaılardy qamtamasyz etý maqsatynda Úkimet Ulttyq taýar ótkizý júıesin qurý boıynsha belsendi jumys júrgizýde, onyń sheńberinde óńirlerde kóterme-taratý ortalyqtary jelisin qurý kózdelgen. Bul óz kezeginde áleýmettik mańyzy bar azyq-túlik taýarlarynyń baǵasyn turaqtandyrýǵa oń áser etýi tıis», - dedi ol Senatta ótip jatqan Úkimet saǵatynda.

Osy rette Senat tóraǵasynyń orynbasary saladaǵy oń úrdiske qaramastan sheshýdi talap etetin birqatar júıeli problema oryn alyp otyrǵanyn aıtty.

«Birinshiden, kóleńkeli saýda eleýli úleske ıe bolyp keledi. Sarapshylardyń pikirinshe, kóleńkeli saýda jalpy saýda kóleminiń jartysyna jýyǵyn quraıdy. Ekinshiden, qazaqstandyq eksporttyń negizin burynǵydaı otyn-energetıka taýarlary, al ımportty joǵary deńgeıde qaıta óńdeý taýarlary qurap otyr. Qazaqstannyń basty eksporttyq taýary - aqshalaı balamada eksporttyń jalpy kóleminiń 51,5 paıyzyn alatyn shıki munaı men munaı ónimderi. Importty kóbinese óńdelgen ónimder, daıyn azyq-túlik taýarlary quraıdy. Mashınalar, jabdyqtar, kólik quraldary ımport qurylymynyń 41 paıyzyn alady. Qazaqstannyń eksporty týraly aıtatyn bolsaq, eksporttyń taýarlyq ártaraptandyrylýy aıtarlyqtaı tómen deńgeıde qalyp otyrǵanyn atap ótken jón»,- dedi Nurlan Ábdirov.

Onyń atap ótýinshe, elimizdiń eksportynyń 50 paıyzy Qytaı, Italııa, Reseı jáne Nıderlandyǵa tıesili bolyp otyr.

Osylaısha, qazaqstandyq eksporttyń sanaýly elder tobymen shektelgendigi baıqalady. Bul rette ımporttyń 62 paıyzy eki elge – Reseıge jáne Qytaıǵa tıesili», - dedi Senat tóraǵasynyń orynbasary.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT