Qazaqstan dzıýdodan Grand Slam týrnırin ótkizý quqyǵyna ıe boldy
ASTANA. QazAqparat – Qazaqstan dzıýdodan bedeldi halyqaralyq týrnır Grand Slam ótkizý quqyǵyna ıe boldy, dep habarlaıdy QazAqparat federatsııaǵa silteme jasap habarlaıly.
Qazaqstan Dzıýdo federatsııasynyń prezıdenti Qýanyshbek Esekeev pen Halyqaralyq dzıýdo federatsııasynyń (IJF) prezıdenti Marıýs Vızer Qazaqstanda Grand Slam álemdik týrnırin ótkizý týraly tórt jyldyq kelisimshartqa qol qoıdy.
Atalǵan kelisimshartqa sáıkes Qazaqstan 2023 jyldan 2026 jylǵa deıin dzıýdodan eń bedeldi halyqaralyq týrnırlerdiń birin ótkizetin basty alańǵa aınalady. Bedeldi álemdik týrnırlerdiń biri eksklıýzıvti ataýǵa ıe boldy, álemdik alaman doda «Qazaqstan barysy Grand Slam» dep atalatyn boldy.
Qazaqstandaǵy týrnırde dzıýdoshylar 2024 jyly Parıjde jáne 2028 jyly Los-Andjeleste ótetin Jazǵy Olımpıada oıyndaryna qatysý úshin upaı jınaıdy. Sonymen qatar, jarys aıaqtalǵannan keıin dzıýdodan halyqaralyq oqý-jattyǵý lageri turaqty negizde ótkiziletin bolady.
Qol qoıý rásimi kezinde Halyqaralyq dzıýdo federatsııasynyń (IJF) prezıdenti Marıýs Vızer, IJF úshin týrnırdi ótkizý quqyǵyn kóptegen talantty sportshylardy baptap shyǵarǵan jáne sport súıer qaýymy men jankúıerleri kóp elge berý úlken mártebe ekenin aıtty. «Qazaqstandyq dzıýdonyń tarıhy tereń, sonymen qatar munda kóptegen iri týrnırler ótkizilip keldi. Bul elde Grand Slam týrnırin ótkizý dzıýdony damytýǵa da, ony tanymal etýge de jańa serpin beretinine senimdimin», - dep atap ótti Vızer myrza.
Al Dzıýdo federatsııasynyń prezıdenti Qýanyshbek Esekeev elimizdiń 2023 jyldan 2026 jylǵa deıin Grand Slam ótkizý quqyǵyn alýy dzıýdo federatsııasynyń orasan zor jetistigi jáne halyqaralyq týrnırlerde Qazaqstan týyn asqaqtatyp, laıyqty óner kórsetetin barlyq sportshylardyń ortaq eńbegi ekenin atap ótti.
«Qazaqstannyń dzıýdodan iri jarystardy ótkizýde aıtarlyqtaı tájirıbesi bar ekenin túsiný mańyzdy – bizdiń elimizde Gran-prı jarystary, «Masters» týrnıri, erler men áıelder arasyndaǵy álem chempıonaty, birneshe ret Azııa chempıonaty, sondaı-aq kadetter arasyndaǵy álem chempıonaty turaqty túrde ótkizilip keledi. Eń bastysy-bizdiń dzıýdoshylar joǵary sporttyq jetistikterin kórsete biletin, álemdik arenadaǵy úzdikterdiń biri bolyp sanalady», - dep atap ótti Q.Esekeev.
Aıta ketý kerek, Parıjdegi Grand Slam-da qazaqstandyq dzıýdoshylar eki medal jeńip aldy. Osylaısha, áıelder arasynda 48 kelige deıingi salmaq dárejesinde óner kórsetken Ábıba Abajýkynova Grand Slam-da qola medal jeńip aldy.
