Qazaqstan bitimgerleri 22 jylda qandaı elderge kómektesti
2022 jylǵy 29 mamyr 16:24

Qazaqstan bitimgerleri 22 jylda qandaı elderge kómektesti

NUR-SULTAN. QazAqparat - Jyl saıyn 29 mamyrda Birikken Ulttar Uıymynyń Halyqaralyq bitimgerler kúni atap ótiledi. 2002 jyly BUU Bas assambleıasynyń qararymen bekitilgen bul kúni bitimgerlerdiń beıbitshilikti saqtaýǵa qosqan úlesi baǵalanady, dep habarlaıdy QazAqparat.

Qazaqstannyń Qarýly kúshteri beıbitshilik pen qaýipsizdikti qoldaý jónindegi operatsııalarǵa belsendi túrde qatysyp keledi.

Elimizdiń áskerı qyzmetshileriniń Birikken Ulttar Uıymy aıasyndaǵy mıssııa tapsyrmalaryn oryndaýy beıbitshilikti qalaıtyn eldiń syrtqy saıasatyn aıqyndaıdy.

2000 jyly Memleket basshysynyń Jarlyǵymen Qazaqstannyń bitimgerlik batalony quryldy.

Al 2003 jyly qarqyndy daıyndyqtan ótken «Qazbattyń» áskerı qyzmetshileri Iraktaǵy bitimgerlik mıssııasyna kiristi.

Operatsııaǵa qatysqan bes jyl ishinde jeke quram on márte rotatsııalandy. Mıssııaǵa barlyǵy 270-ten astam áskerı qyzmetshi qatysty.

Irakta elden barǵan mamandar 4,5 mln astam oq-dárini, onyń ishinde mınalardy, zymyrandar men snarıadtardy joıdy.

Negizinen terrorıstik shabýyldan zardap shekken jergilikti halyqqa medıtsınalyq kómek kórsetti. 6700 tekshe metrden astam sýdy tazartty.

2014 jyldan bastap Qazaqstannyń ókilderi Batys Sahara men Kot-d'Ivýardaǵy mıssııalarda shtabtyq ofıtserler men áskerı baıqaýshylar retinde qyzmet etti.

2018 jyly Qazaqstan kontıngenti men shtabtyq ofıtserler mandattyń oryndalýyn qamtamasyz etý úshin BUU-nyń Lıvandaǵy ýaqytsha kúshteriniń mıssııasyna (UNIFIL) jiberildi.

Osy ýaqyt ishinde 6 rotatsııa júrgizildi. Oǵan 500-den astam áskerı qyzmetshi qatysty.

Batys Sahara men Lıvandaǵy BUU-nyń mıssııalaryna shtabtyq ofıtserler men áskerı baıqaýshylar rólinde qazaqstandyq áskerı qyzmetshi áıelder, polkovnık Dılıa Ahmetova, podpolkovnıkter Sholpan Taýysheva men Sábına Muzalınova, maıor Rımma Shákeeva, kapıtan Aıjan Jasuzaqova da qatysqanyn atap ótken jón.

Qazirgi ýaqytta Batys Saharada kapıtan Mádına Kamaletdınova qyzmet etip júr.

Búgingi tańda Qorǵanys mınıstrligi Memleket basshysynyń tapsyrmasymen BUU-nyń bitimgerlik operatsııalaryna el áskerı qyzmetshileriniń qatysý aýqymyn keńeıtý jónindegi is-sharalar keshenin oryndaý ústinde.

Qazaqstan aǵymdaǵy bitimgerlik mıssııalarǵa barynsha qajet saperlerdiń, áskerı medıkterdiń, barlaý jáne áskerı polıtsııanyń arnaıy bólimsheleri barady dep otyr.

Budan ózge 2022 jylǵy 16 mamyrda Ujymdyq qaýipsizdik týraly shart uıymyna múshe elder basshylarynyń mereıtoılyq sammıtinde Qazaqstan Prezıdenti Qasym-Jomart Toqaev UQShU-ny BUU-nyń bitimgerlik qyzmetine qosý týraly bastama kótergen bolatyn.

Bul qadam UQShU-nyń quqyqtyq sýbektiligin nyǵaıtyp, uıymnyń beıbitshilikti qoldaý jónindegi halyqaralyq operatsııalarǵa qatysý tájirıbesin qamtamasyz etedi.

Bizdiń eldiń bitimgerlik qyzmeti qarýly qaqtyǵystardyń aldyn alýda jáne olardy toqtatýda halyqaralyq qoǵamdastyqqa járdemdesýge arnalǵan.


Jańalyqtar

MURAǴAT