Qazaqstan Beıjińdegi Olımpıadaǵa dıplomatııalyq boıkot jarııalaı ma – Mınıstrlik jaýaby
2022 jylǵy 25 qańtar 17:28

Qazaqstan Beıjińdegi Olımpıadaǵa dıplomatııalyq boıkot jarııalaı ma – Mınıstrlik jaýaby

NUR-SULTAN. QazAqparat – QR Mádenıet jáne sport vıtse-mınıstri Serik Jarasbaev «Qazaqstan Beıjińde ótetin Qysqy Olımpıadaǵa basqa elder sekildi dıplomatııalyq boıkot jarııalaı ma?» degen suraqqa jaýap berdi, dep habarlaıdy QazAqparat.

«Keıbir elderdiń bul másele boıynsha óz ustanymdaryn bildirgeni túsinikti, biraq el prezıdenti Qasym-Jomart Toqaev bizdiń sportshylarymyzdy, qurama komandalardyń kapıtandaryn jáne paralımpıadashylardy qabyldap, olarǵa Olımpıada oıyndaryna aparatyn Týdy tapsyrdy. ıAǵnı, munda eshqandaı boıkot týraly sóz joq. Oǵan qosa, Syrtqy ister mınıstrligi Prezıdenttiń Olımpıada oıyndaryna qatysýy máselesin pysyqtap jatyr. BAQ-ta Beıjiń tarapy el basshylyǵyn resmı túrde shaqyrǵany týraly aqparat boldy. Osyǵan baılanysty, Olımpıadaǵa tolyqqandy qatysatynymyzdy aıtqym keledi, bizde keıbir elder kótergen máselelerge qatysýǵa esh negiz joq», - dedi Serik Jarasbaev.

Sonymen birge, bul máselege Ulttyq Olımpıada komıtetiniń ókili de pikir bildirdi.

«Kúrish pen kúrmekti – sport pen úlken saıasatty ajyrata bilý kerek. Bul máselede de eki túrli nárse bar. Biz munda eki túrli álemniń qaqtyǵysyn kórip otyrmyz jáne sáıkesinshe árqaısysy ózinshe áreket etedi. Biz saıasatty emes, sportty oılaımyz. Bul jerde bizdiń ustanymymyz birdeı», - dedi Qazaqstan UOK Bas hatshysy Andreı Krıýkov.

Aıta keteıik, XXIV qysqy Olımpıada oıyndary Qytaıdyń Beıjiń qalasynda, 2022 jyldyń 4 men 20 aqpan aralyǵynda ótedi.

Qazaqstannan baratyn 34 sportshy 87 sport túrinen lıtsenzııa alǵan.



Jańalyqtar

MURAǴAT