Jańalyqtar  >
  Qoǵam

Qazaqstan avıatsııasynyń IKAO talaptaryna sáıkestigi 84 paıyzǵa jetti

2022 jylǵy 1 qazan, 13:21
Qazaqstan avıatsııasynyń IKAO talaptaryna sáıkestigi 84 paıyzǵa jetti

ASTANA. QazAqparat - Halyqaralyq azamattyq avıatsııa uıymynyń bas hatshysy Qazaqstannyń azamattyq avıatsııasyn retteýdiń eýropalyq modelin engizý barysyn joǵary baǵalady, dep habarlaıdy QazAqparat.

IKAO Assambleıasynyń 41-shi sessııasy sheńberinde Azamattyq avıatsııa komıtetiniń tóraǵasy Talǵat Lastaev bastaǵan qazaqstandyq delegatsııa IKAO Bas hatshysy Hýan Karlos Salazarmen IKAO eýropalyq jáne Soltústik Atlantıkalyq (EUR/NAT) óńirlik bıýrosynyń dırektory Nıkolıa Rallonyń qatysýymen kezdesý ótkizdi.

Onyń barysynda ushý qaýipsizdigin arttyrý boıynsha qabyldanyp jatqan sharalar baıandaldy.

IKAO Bas hatshysy 2017 jyldan bastap Qazaqstanda azamattyq avıatsııany retteýdiń eýropalyq modelin engizýdi joǵary baǵalady jáne qoldady.

Bul IKAO qaýipsizdik standarttaryna tolyq sáıkes keletin álemdegi eń ozyq jáne eń tıimdi tásilderdiń biri ekenin aıtty.

Salazar myrza Qazaqstannyń IKAO standarttary men usynylatyn praktıkasyna adaldyǵy úshin rızashylyǵyn bildirip, IKAO-nyń 2021 jylǵy valıdatsııalyq baǵalaýynyń nátıjesi boıynsha Qazaqstannyń IKAO talaptaryna 84% sáıkestigi boıynsha ilgerileýin atap ótti.

IKAO Bas hatshysy jáne IKAO eýropalyq jáne Soltústik Atlantıkalyq (EUR/Nat) óńirlik bıýrosynyń dırektory Qazaqstannyń IKAO 41-shi Assambleıasyna jáne IKAO óńirlik bıýrosy ótkizetin is-sharalarǵa belsendi qatysqany úshin alǵys aıtty.

Óz kezeginde qazaqstandyq delegatsııanyń basshysy Talǵat Lastaev IKAO basshylyǵymen belsendi qoldaý tapqan birlesken jumys pen tájirıbe almasý úshin IKAO shtab-páterinde Qazaqstannyń avıatsııalyq bılik ókildigin qurý týraly bastama kóterdi.

Kezdesý barysynda qazaqstandyq tarap IKAO-nyń aldyńǵy eki Bas hatshysynyń Qazaqstanǵa barý tájirıbesin eskere otyryp, Salazar myrzany jaqyn arada Qazaqstanǵa resmı saparmen kelýge shaqyrdy.

Bas hatshy bul usynysty qabyldap, eki jaqqa da yńǵaıly ýaqytta Qazaqstanǵa qýana keletindigin habarlady.

Halyqaralyq Azamattyq avıatsııa uıymy (IKAO) - qaýipsizdik pen tıimdilikti arttyrý maqsatynda Azamattyq avıatsııanyń halyqaralyq normalaryn belgileıtin jáne onyń damýyn úılestiretin Birikken Ulttar Uıymynyń (BUU) mamandandyrylǵan mekemesi.

IKAO 1944 jylǵy Chıkago konventsııasynyń ІІ bóliminiń erejeleri negizinde quryldy. Shtab-páteri Monrealda (Kanada) ornalasqan.

IKAO músheleri -193 memleket.


Tegı:
Uqsas jańalyqtar
Seriktester jańalyqtary

Jańalyqtar