Qazaqstan áskerıleri eldegi tótenshe jaǵdaı rejımin qalaı qamtamasyz etip jatyr
2022 jylǵy 10 qańtar 17:38

Qazaqstan áskerıleri eldegi tótenshe jaǵdaı rejımin qalaı qamtamasyz etip jatyr

NUR-SULTAN. QazAqparat - QR Prezıdenti tótenshe jaǵdaı jarııalaǵan sátten bastap atalǵan rejımdi qamtamasyz etý úshin Qorǵanys mınıstrliginiń bólimsheleri kúsheıtilgen jumysqa kóshti, dep habarlaıdy QazAqparat.

Eń aldymen áskerı bólimderdi, qarý-jaraq pen oq-dári qoımalaryn kúzetý kúsheıtildi.

Bul óz kezeginde áskerı qarý-jaraqtyń qylmyskerlerdiń qolyna túsýine jol bermedi.

Sondaı-aq, áskerı áýe aılaqtaryn, áýejaılardy, halyqtyń tynys-tirshiligin qamtamasyz etý obektilerin kúzetý kúsheıtildi.

Qarýly Kúshterdiń áskerı qyzmetshileri ákimshilik pen qalanyń ortalyq alańdaryn qorshaýǵa alýǵa jumyldyryldy.

Áskerı qyzmetshilerdiń kópshiligi dál osy qaqtyǵystarda zardap shekti. Óıtkeni beıbereket áreket etken adamdar toby sýyq jáne atys qarýlaryn, tastardy qoldana otyryp jolyndaǵynyń bárin qıratqan.

Eldiń birqatar aımaqtarynda ekstremıster áskerı bólimderge shabýyl jasaýǵa tyrysty.

Degenmen, sodyrlarǵa qarýly toıtarys berilip, nátıjesinde olar áskerı nysandarǵa kire almady.

Qazirgi ýaqytta barlyq eldi mekenderde Qarýly Kúshterdiń áskerı qyzmetshileri polıtsııa jáne Ulttyq ulan qyzmetkerlerimen birlesip tosqaýyl beketterinde qyzmet ótkerip, baqylap-ótkizýdi júzege asyryp, sondaı-aq mańyzdy obektilerdi kúzetedi.

Qarýly Kúshterdiń áskerı qyzmetshileri terrorızmge qarsy operatsııa júrgizilip jatqan Almaty óńirinde erekshe jaýapty jáne qaýipti jaýyngerlik mindetterdi oryndaýda.

Arnaıy jaýyngerlik is-qımyldarǵa ofıtserler men kelisimshart boıynsha áskerı qyzmetshiler tartyldy.

El Prezıdenti jaýyngerlerdiń batyldyǵyna erekshe nazar aýdardy.

Memleket basshysy otandastarymen maqtanatynyn aıtyp, Qazaqstannyń odan ári ósip-órkendeıtinine senim bildirdi.


Jańalyqtar

MURAǴAT