Qazaqstan 2026 jylǵa qaraı sheteldik ınvestıtsııa aǵynyn 25,5 mlrd dollarǵa arttyrady
2022 jylǵy 23 maýsym 09:32

Qazaqstan 2026 jylǵa qaraı sheteldik ınvestıtsııa aǵynyn 25,5 mlrd dollarǵa arttyrady

NUR-SULTAN. QazAqparat – Qazaqstan 2026 jylǵa qaraı sheteldik ınvestıtsııa aǵynyn 25,5 mlrd dollarǵa arttyrady. Bul týraly búgin Úkimet otyrysynda QR Ulttyq ekonomıka birinshi vıtse-mınıstri Tımýr Jaqsylyqov aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes, Dúnıejúzilik banktiń qatysýymen Ulttyq ekonomıka mınıstrligi memlekettik organdarmen jáne uıymdarmen birlesip, Qazaqstan Respýblıkasynyń 2026 jylǵa deıingi Investıtsııalyq saıasaty tujyrymdamasynyń jobasyn ázirledi. Tujyrymdama jobasynda kózdelgen negizgi nysanaly ındıkatorlar – negizgi kapıtalǵa ınvestıtsııalar deńgeıin JІÓ-ge 25,1 paıyzǵa deıin jetkizý jáne tikeleı sheteldik ınvestıtsııalar aǵynyn 2026 jyldyń ózinde 25,5 mlrd AQSh deıin arttyrý», - dedi vıtse-mınıstr tujyrymdama jobasyn tanystyra kele.

Onyń atap ótýinshe, atalǵan maqsattarǵa qol jetkizý úshin tujyrymdama jobasymen ınvestıtsııalar tartý saıasatyn qaıta qaraý jónindegi sharalar kesheni kózdelgen. Bul jańa trendterdi eskere otyryp, ınvestıtsııalar qurylymyn básekege qabiletti, qosylǵan quny joǵary taýarlardy óndirý jaǵyna ózgertýge múmkindik beredi.

«Investıtsııalyq damýdyń negizgi paıymy árbir salanyń ekonomıkany damytýǵa qosqan úlesin eskere otyryp, ınvestıtsııalar tartýǵa teńdestirilgen tásilden turady. Óńdeý ónerkásibi básekege qabilettilikti arttyrýdyń tıimdi draıveri bolady. Munda eńbek ónimdiliginiń ósýine, eksport kólemin ulǵaıtýǵa jáne kúrdeliligin arttyrýǵa, qaıta óńdeýdiń anaǵurlym joǵary óndirisin ıgerýge, óndiristi kezeń kezeńimen oqshaýlaýǵa basa nazar aýdarylady.

Bul rette memlekettik qoldaý jeke kapıtaldyń jetispeýshiligi bar, joǵary tehnologııaly kapıtaldy qajet etetin jobalardy iske asyrý úshin basym kórsetiledi», - dedi Tımýr Jaqsylyqov.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT