QazAqparat tilshisi «Qurmet» gramotasymen marapattaldy
2022 jylǵy 28 maýsym 18:56

QazAqparat tilshisi «Qurmet» gramotasymen marapattaldy

NUR-SULTAN. QazAqparat – Jýrnalıster kúni aıasynda Prezıdent Teleradıokesheniniń mamandary «Aqparat salasynyń úzdigi» tósbelgisimen jáne «Qurmet» gramotasymen marapattaldy, dep habarlaıdy QazAqparat tilshisi.

Marapatty Qazmedıa ortalyǵynda QR Aqparat jáne qoǵamdyq damý mınıstri Asqar Omarov tabys etti jáne barsha jýrnalısti tól merekesimen quttyqtady.

«Bizdegi medıa salasy óte tabysty damyp keledi, jańa tendentsııalar paıda bolyp jatyr. Bul Qazaqstannyń medıasferasy ishki alańda ǵana emes, syrtqy medıasferada da jumys istep jatqanyn kórsetedi. Bizdiń serıaldar kóptegen elderge satylady. Bizdiń ınnovatsııalyq ónimderimizge kórshi elder qyzyǵýshylyq tanytyp otyr. Bizdiń jańalyqtarymyzǵa basqa elder silteme jasaıdy. Mysaly, kórshiles elde bizdiń úsh aqparattyq agenttigimiz silteme jasalǵan resýrstardyń qataryna kiredi. Munda toqtap qalýǵa bolmaıdy. Bizdiń medıasalanyń áleýeti aıtarlyqtaı joǵary», - dedi Aqparat mınıstri.

Asqar Omarov eldegi telearnalar, aqparattyq portaldar, aqparattyq agenttikter óndiretin ónimderdiń suranysqa ıe ekenin atap ótti. Bul rette, buqaralyq aqparat quraldarynyń kópshiligi kontıngenttik formatty paıdalanady, jańa jaǵdaıda ómir súredi.

«Internettiń, vırtýaldy ortanyń qarqyndy damýymen birge bizdiń BAQ básekege qabiletti bola túsedi. Aqparat jáne qoǵamdyq damý mınıstrligi buǵan tek járdem etedi», - dedi Asqar Omarov.

Aqparat mınıstri birqatar BAQ qyzmetkerin «Qurmet» gramotasymen jáne «Aqparat salasynyń úzdigi» tósbelgisimen marapattady. Olardyń qatarynda Prezıdent Teleradıokesheniniń qyzmetkerleri de bar.

Atap aıtqanda, Teleradıokeshen quramyndaǵy «Qazaq TV» telearnasynyń bas redaktory Áıgerim Ospanova «Aqparat salasynyń úzdigi» tósbelgisimen marapattaldy.

Al «QazAqparat» halyqaralyq aqparat agenttiginiń tilshisi Aqbota Kúzekbaı BAQ salasynyń damýyna qosqan úlesi men minsiz qyzmeti úshin «Qurmet» gramotasymen marapattaldy.


Jańalyqtar

Úrdis

MURAǴAT