Qazaq qyzy Los-Anjeleste 40-qa jýyq jetkinshekke qazaq tilin úıretip júr
2022 jylǵy 8 sáýir 19:54

Qazaq qyzy Los-Anjeleste 40-qa jýyq jetkinshekke qazaq tilin úıretip júr

NUR-SULTAN. QazAqparat - «Bolashaq» baǵdarlamasynyń stıpendıaty Ásel Ábildaeva Los-Andjeles qalasyndaǵy Ońtústik Kalıfornııa ýnıversıtetinde ǵylymı taǵylymdamadan ótip júr. Ol bos ýaqytynda Qazaq Community California aıasynda balalarǵa Qazaqstan tarıhy men qazaq tilin úıretedi, dep habarlaıdy QazAqparat.

«Bolashaq» halyqaralyq baǵdarlamalar ortalyǵynyń málimetinshe, Ásel balalarǵa arnalǵan oqý baǵdarlamasyn ázirlegen.

Ol óziniń sabaqtarynda geımıfıkatsııa elementterin belsendi qoldana otyryp, qazaq tilin jeńil ári qyzyqty etip úıretýde.

«Meniń oıymsha, shetelde turatyn otandastarym, ásirese balalar ana tilin, mádenıetin, halqynyń tarıhyn bilýi kerek. Balalar qazaq tilin, elimizdiń tarıhyn qýana oqıdy. Men olarǵa uly babalarymyz, handarymyz, batyrlarymyz týraly áńgimeleımin jáne qazaq jazýshylarynyń, aqyndarynyń, ǵalymdarynyń ómirbaıanymen, shyǵarmashylyǵymen tanystyryp otyramyn. Kórnekti aǵartýshy, qoǵam qaıratkeri, ǵalym-reformator, qazaq til biliminiń negizin salýshy Ahmet Baıtursynulynyń 150 jyldyq mereıtoıy qarsańynda balalarmen birge tanystyrylym ótkizip, ult ustazynyń Qazaqstan tarıhyndaǵy orny týraly áńgimelestik», – deıdi «Bolashaq» baǵdarlamasynyń stıpendıaty Ásel Ábildaeva.

Qazir Ásel 7-12 jas aralyǵyndaǵy 40-qa jýyq balany oqytyp otyr.

Balalar az ǵana ýaqyttyń ishinde ana tilinde sóıleý men jazýdy meńgerip úlgerdi. Balalar ana tilinde bir-birimen pikirlesip, óz oıyn jetkize alady.

«Los-Andjeles qalasynda turatyn qazaq balalary ulttyq salt-dástúrge, tarıhı otanyna qatysty barlyq aqparatqa qyzyǵady. Men olardyń búkil suraqtaryna jaýap berip, qazaq tiline degen qyzyǵýshylyǵyn odan ári arttyrýǵa tyrysamyn», - deıdi Ásel.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT