Qazaq-qytaı shekarasy shtattyq rejımde jumys istep tur
2022 jylǵy 21 qańtar 08:41

Qazaq-qytaı shekarasy shtattyq rejımde jumys istep tur

NUR-SULTAN. QazAqparat - Qazaqstan-Qytaı shekarasyndaǵy tekserýler taýarlardy kedendik shekara arqyly zańdy túrde ótkizýge kedergi keltirmeıdi. Bul týraly Memlekettik kirister komıtetinen málim etti, dep habarlaıdy QazAqparat.

Qazirgi ýaqytta Memleket basshysynyń tapsyrmasy sheńberinde Bas prokýratýra, Qarjy monıtorıngi agenttigi jáne Qarjy mınıstrligi ókilderinen arnaıy qurylǵan jumys toby qazaq-qytaı shekarasynda tekserý júrgizip jatyr.

Tekserý tek qana ýákiletti ekonomıkalyq operator mártebesi bar ımporttaýshylarǵa qatysty.

Tekserý qorytyndysy boıynsha Qazaqstan Respýblıkasynyń zańnamasynda kózdelgen sharalar qabyldanady.

Bul tekserýler taýarlardy kedendik shekara arqyly zańdy túrde ótkizýge kedergi keltirmeıdi jáne adal bıznes syrtqy ekonomıkalyq qyzmetti shekteýsiz júzege asyrady.

2021 jyldyń qorytyndysy boıynsha naryqta QHR-men ımporttyq operatsııalardy júzege asyratyn 7241 syrtqy ekonomıkalyq qyzmetke qatysýshy bar.

Onyń ishinde 17 sýbekti - ÝEO, olarǵa ımporttyń barlyq kóleminiń 18% tıesili.

Bul rette 5 ÝEO – óz muqtajdyǵy úshin ónimderdi ımporttaıtyn óndiristik sektor jáne 2 ÝEO kvazımemlekettik sektor («Qazpochta» AQ jáne «QTJ» AQ enshiles uıymy – «KTZ Express» AQ).

Sondaı-aq «KTZ Express» AQ - kedendik ókil jáne halyqaralyq ekspedıtor. Qazaqstan-qytaı shekarasynda ózindik ınfraqurylymy bar.

Ortalyq Azııadaǵy eń iri «KTZE-Khorgos Gateway» qurǵaq portymen jumys isteıdi, sondaı-aq KIF Warehouses A klasty qoımalary bar.

Operatordyń basty artyqshylyǵy – tapsyrys berýshiler úshin de, fıskaldyq organdar úshin de ashyq qyzmeti.

Jalpy qazaqstan-qytaı shekarasyndaǵy ótkizý pýnktteri men taýarlardy kedendik tazartýdyń ózge de oryndary belgilengen jumys rejımine sáıkes qyzmetin jalǵastyryp jatyr.


Jańalyqtar

MURAǴAT