Qaırat Ábsattarov Jezqazǵan ákimi laýazymynan bosatyldy
2022 jylǵy 23 maýsym 17:50

Qaırat Ábsattarov Jezqazǵan ákimi laýazymynan bosatyldy

JEZQAZǴAN. QazAqparat – Qaırat Ábsattarov basqa qyzmetke aýysýyna baılanysty Jezqazǵan qalasy ákimi laýazymynan bosatyldy, dep habarlaıdy QazAqparat tilshisi.

Qaırat Ábsattarov Jezqazǵan qalasynyń ákimi laýazymyn eki jylǵa jýyq ýaqyt atqardy. Feısbýktegi paraqshasynda qala turǵyndaryna týǵan ólkeni damytýda birlese eńbek etkeni úshin alǵys bildirdi.

«Qurmetti jerlester, ardaqty ata jurtym, qala ákimi laýazymyndaǵy 2 jylǵa jýyq qyzmetim máresine jetip, aldaryńyzdan ótýdiń kezi de keldi.

Sizderge alǵashqy kúnnen bastap, ákim qyzmetine kelgen sebebimdi aıtqan bolatynmyn - ol týǵan jerimniń, qalamnyń jaı-kúıin jaqsartýǵa rııasyz qyzmet atqaryp, úlesimdi qosý.

Osy ýaqytta qalamyzdyń ystyǵy men sýyǵyn halyqpen birge kórdim. Ózderińizben «estıtin Úkimet» qaǵıdatymen ashyq dıalog qurýǵa barynsha tyrystym. Júıesizdik basym jaǵdaıynda toqyrap qalǵan qala tirligin jandandyrý úshin halyqpen úndestiktiń aýadaı qajet ekenin barynsha túsinip, problemalardy qoǵamǵa da, joǵarǵy basshylyqqa da ashyq jarııaladym - bul tozyǵy jetken qalamyzdyń jan-jaqty jaı-kúıin joǵary jaqtyń da tereń sezinýine jetkizýdiń amaly edi.

Árıne, bul formattaǵy jumys ákimshilikti de aıamady - ótkir syn da aıtyldy, orynsyz min de taǵyldy.

Desek te, bul baǵyt ákimdik mekemeleriniń belsendiligin arttyrdy. Bul formatty únemi ustaný qajet, sebebi, memlekettik qyzmettiń halyqpen jarııalylyq túrde jumys atqarýy «Jańa Qazaqstannyń» talaby», - dep jazdy ol paraqshasynda.

Qaırat Ábsattarov Jezqazǵan qalasy ákimi laýazymynan basqa qyzmetke aýysyýyna baılanysty bosatyldy. Ázirge qalaǵa jańa ákim taǵaıyndalǵan joq.


Uqsas jańalyqtar

Jańalyqtar

Úrdis

MURAǴAT