Qaýipsizdik Keńesi balalardyń qaýipsizdigin qamtamasyz etý jáne quqyqtaryn qorǵaý máselelerin qarady

NUR-SULTAN. QazAqparat - Qaýipsizdik Keńesiniń Apparatynda balalardyń qaýipsizdigin qamtamasyz etý jáne quqyqtaryn qorǵaý máseleleri qaraldy, dep habarlaıdy QazAqparat Aqordanyń resmı saıtyna silteme jasap.

Memleket Basshysy Qasym-Jomart Toqaev 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda balalardyń qaýipsizdigi men quqyqtaryn qorǵaý máselelerine erekshe nazar aýdarýdy, kámeletke tolmaǵandarǵa qatysty zorlyq-zombylyqqa baılanysty tergelip jatqan árbir isti baqylaýdy qamtamasyz etýdi tapsyrdy.

Osy baǵyttaǵy jumystardyń qazirgi jaǵdaıyn talqylaý jáne ony jetildirý sharalaryn ázirleý maqsatymen Prezıdenttiń kómekshisi – Qaýipsizdik Keńesiniń hatshysy Áset Isekeshevtiń tóraǵalyǵymen keńes ótti.

Jıynǵa Bala quqyqtary jónindegi ýákil Arýjan Saın, Joǵarǵy Sottyń, Bas prokýratýranyń, Іshki jáne Syrtqy ister, Ádilet, Bilim jáne ǵylym mınıstrlikteriniń ókilderi qatysty.

Kámeletke tolmaǵandarǵa qatysty zorlyq-zombylyqqa, balalar saýdasyna qarsy is-qımyldardy, sondaı-aq, balalar úıleri men ınternattarda tıisti jaǵdaılardy qamtamasyz etý máseleleri qarastyryldy.

Keńes qorytyndysy boıynsha Qaýipsizdik Keńesiniń Apparaty janynan balalardyń quqyqtary men zańdy múddelerin qorǵaý, kámeletke tolmaǵandarǵa qatysty qylmystyq qol suǵýshylyqtyń aldyn alý jáne jolyn kesý jónindegi barlyq ýákiletti organdardyń qyzmetin úılestirý úshin turaqty vedomstvoaralyq jumys tobyn qurý týraly sheshim qabyldandy.

Sonymen qatar kámeletke tolmaǵandardyń jynystyq tıispeýshilik quqyǵyna qarsy qylmys jasaǵany úshin jazasyn ótegennen keıin túrmeden bosatylǵan adamdardy baqylaýǵa jáne esepke alýdy qamtamasyz etý úshin memlekettik organdarǵa qosymsha sharalar qabyldaý tapsyryldy.