Qatar bıligi Qazaqstanmen avıatsııa jáne týrızm salasyndaǵy yntymaqtastyqqa múddeli
2022 jylǵy 21 maýsym 20:48

Qatar bıligi Qazaqstanmen avıatsııa jáne týrızm salasyndaǵy yntymaqtastyqqa múddeli

NUR-SULTAN. QazAqparat - Búgin Dohada QR Ulttyq ekonomıka mınıstri Álibek Qýantyrov pen Qatar memleketiniń Saýda jáne ındýstrııa mınıstri - joǵary deńgeıdegi Qazaqstan-Qatar birlesken komıssııasynyń teń tóraǵasy sheıh Muhammed bın Hamad Ál Tanıdiń kezdesýi ótti.

QR Ulttyq ekonomıka mınıstrligi baspasóz qyzmetiniń habarlaýynsha, taraptar ekonomıkany ártaraptandyrý, álemdik naryqtaǵy qazirgi jaǵdaıda kólik-logıstıka salasyn damytý boıynsha ekijaqty ózara is-qımyldyń keń aýqymdy máselelerin qozǵady, sondaı-aq joǵary deńgeıdegi Qazaqstan-Qatar birlesken komıssııasy sheńberinde saýda-ekonomıkalyq, ınvestıtsııalyq jáne mádenı-gýmanıtarlyq salalarda qol jetkizilgen ýaǵdalastyqtardy iske asyrý máselelerin talqylady.

2020 jyldyń aqpan aıynda ótken Komıssııanyń sońǵy otyrysynda birqatar kelisimderge qol jetkizildi.

Atap aıtqanda, Qatar ınvestıtsııalyq qorynyń, arab eliniń memlekettik jáne jeke kompanııalarynyń Qazaqstanǵa ınvestıtsııa salý, onyń ishinde QR jekeshelendirý baǵdarlamasyna qatysý. Aýyl sharýashylyǵy ónimderiniń eksportyna/ımportyna baılanysty problemalyq máselelerdi sheshý úshin jumys tobyn qurý.

Qatar bıligi avıatsııa jáne týrızm salasyndaǵy yntymaqtastyqqa da múddeli.

Kezdesý qorytyndysy boıynsha taraptar saýda-ekonomıkalyq baılanystardy odan ári damytý qajettiligin atap ótti.

Sonymen qatar, QR UEM basshysy Qatar Investment Authority - Qatar ınvestıtsııalyq qorynyń óńirlik basqarýshysy sheıh Faısal Tanı Ál Tanımen kezdesý ótkizdi.

Kezdesý barysynda ınvestıtsııalyq yntymaqtastyq, sondaı-aq iskerlik baılanystardy jandandyrý máseleleri talqylandy.

Á.Qýantyrov atap ótkendeı, Qazaqstan sheteldik ınvestorlar úshin árdaıym ashyq. Bizdiń elimiz bolashaqta da seriktester aldyndaǵy óz mindettemeleri men kepildikterin tolyq kólemde oryndaıtyn bolady.

Óz kezeginde sheıh Faısal Tanı Ál Tanı Qazaqstannyń ınvestıtsııalyq jobalaryna qyzyǵýshylyq tanytty.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT