Jańalyqtar  >
  Sport

Qatar-2022: Shveıtsarııany utqan Brazılııa pleı-off kezeńine joldama aldy

2022 jylǵy 28 qarasha, 23:55
Qatar-2022: Shveıtsarııany utqan Brazılııa pleı-off kezeńine joldama aldy

ASTANA. QazAqparat – Qatarda fýtboldan ótip jatqan álem chempıonatynda G tobynda Brazılııa men Shveıtsarııa quramalary sheberlik baıqasty, dep habarlaıdy QazAqparat tilshisi.

Birinshi týrda bes dúrkin álem chempıony Brazılııa Serbııany 2:0 esebimen tize búktirse, Shveıtsarııa Kamerýndy jeńgen edi (1:0).

Búgin Kamerýn – Serbııa quramalary tartysty básekede 3:3 esebimen teń tústi. Sondyqtan Brazılııa nemese Shveıtsarııanyń qaı jeńgeni pleı-off kezeńine joldama alatyny anyq edi.

Birinshi taımda Tıte shákirtteriniń basymdylyǵy baıqalǵanymen, esep ashylǵan joq.

Ekinshi kezeńde shveıtsarııalyqtardyń oıynyna jan bitip, Brazılııa qaqpasyn qaraýylǵa aldy. Biraq odan eshteńe shyqpady. 58-mınýtta brazılııalyq Vınısıýs Jýnıor qaqpaǵa qaraı baǵyttaǵan dopqa Serbııamen matchtyń qaharmany Rısharlıson sál-pál jetpeı qaldy. Al 64-mınýtta V.Jýnıor qaqpaǵa salǵan dop ofsaıdqa baılanysty gol eseptelmedi. Degenmen 83-mınýtta brazılııalyqtar degenine jetti. Taǵy da sol qanattan Vınısıýs Rodrıgoǵa pas berdi. Odan dop alǵan Kazemıro ádemi soqqysymen kózge tústi – 1:0.

Osylaısha, G tobynda Shveıtsarııany 1:0 esebimen utqan Brazılııa álem chempıony Frantsııadan keıin ekinshi bolyp birinshiliktiń 1/8 fınalyna shyqty. Ekinshi joldama máselesi 2 jeltoqsanda sheshiledi. Bul kúni Shveıtsarııa Serbııamen, Brazılııa Kamerýnmen oınaıdy.

Sońǵy ret budan 20 jyl buryn álem chempıony atanǵan Brazılııa sol tabysyn qaıtalaı ala ma, ony aldaǵy oıyndar barysy kórsetedi.

Eske sala keteıik, budan buryn Horvatııanyń Kanadany iri eseppen utqanyn jazǵan bolatynbyz.

Sondaı-aq Ispanııa men Germanııa quramalary teń tarqasty.

Kamerýn men Serbııa teń tústi.


Foto: sports.kz

Uqsas jańalyqtar
Seriktester jańalyqtary

Jańalyqtar