Jańalyqtar  >
  Sport

Qatar-2022: Messı bastaǵan Argentına shırek fınalǵa shyqty

2022 jylǵy 4 jeltoqsan, 03:00
Qatar-2022: Messı bastaǵan Argentına shırek fınalǵa shyqty

ORAL. QazAqparat – Qatarda fýtboldan ótip jatqan álem chempıonatynda 1/8 fınalda Argentına men Aýstralııa komandalary kezdesti, dep habarlaıdy QazAqparat tilshisi.

Birinshilikti kútpegen jerden Saýd Arabııasynan jeńilip, sátsiz bastaǵan Argentına quramasy keıingi eki oıynda jaǵdaıyn túzep, óz tobynda birinshi orynǵa ıe boldy.

Aýstralııa D tobynda dop aıyrmasy boıynsha Frantsııany alǵa jiberip, pleı-ofqa joldama alǵan edi.

Argentına men Aýstralııanyń osyǵan deıin 7 ret joldary toqaılasqan. Tórt joldastyq kezdesýdiń úsheýinde argentınalyqtar jeńiske jetip, bireýi aýstralııalyqtardyń paıdasyna sheshilgen.

1993 jyly 1994 jylǵy álem chempıonatyna joldama alý úshin qurlyqaralyq básekede Aýstralııa óz alańynda teń túsken. Syrt alańda bir ǵana dop aıyrmasymen ese jibergen.

Al 2005 jyly Konfederatsııa kýboginde Argentına iri eseppen (4:2) utqan bolatyn.

Sporttyq jolynda myńynshy márte jasyl alańǵa shyqqan Argentına kapıtany Lıonel Messı myqty ekendigin taǵy bir dáleldedi.

35-mınýtta ádemi uıymdastyrylǵan shabýyldan keıin Messı qaqpa buryshyn dál kózdedi – 1:0. Bul onyń 789-ynshy, álem chempıonatyndaǵy 9-ynshy goly edi.

Ekinshi kezeńde 57-mınýtta aýstralııalyq qaqpashy ári kapıtan Metıý Raıannyń qateligin paıdalanǵan Hýlıan Alvares esepti 2:0-ge jetkizdi.

Degenmen alańǵa tyńnan qosylǵan aýstralııalyq shabýylshy Kreıg Gýdvın 77-mınýtta tepken dop argentınalyq qorǵaýshy Entso Fernandeske tıip, qaqpada týlap jatty.

Bul avtogol esebinde jazyldy. Bes mınýttan keıin Lısandro Martınes Argentına qaqpasyn aman alyp qaldy.

89-mınýtta keremet oınaǵan Messıden pas alǵan Laýtaro Martınes urymtal sátte dál tebe almady. Tartysty oıyn budan keıin de báseńsigen joq.

Osylaısha, Aýstralııany 2:1 esebimen joldan taıdyrǵan Argentına 9 jeltoqsanda Nıderland quramasymen jartylaı fınal joldamasyn sarapqa salady.

Eske sala keteıik, budan buryn Brazılııanyń eki fýtbolshysy álem chempıonatynyń qalǵan oıyndaryna qatysa almaıtynyn jazǵan bolatynbyz.

Sondaı-aq Lıonel Messı sport karerasynda myńynshy márte jasyl alańǵa shyqty.

Foto: metaratings.ru


Uqsas jańalyqtar
Seriktester jańalyqtary

Jańalyqtar