+7 (701) 759 90 19
USD 420.79 EUR 511.98
RUB 5.67 CNY 64.46
Jańalyqtar

Qasym-Jomart Toqaev Ulttyq qoǵamdyq senim keńesiniń tórtinshi otyrysyna qatysty

2020 jylǵy 22 qazan 17:59
Bólisińiz:
Qasym-Jomart Toqaev Ulttyq qoǵamdyq senim keńesiniń tórtinshi otyrysyna qatysty

NUR-SULTAN. QazAqparat - Memleket basshysy sóılegen sózinde Ulttyq keńestiń bılik pen qoǵam arasynda syndarly dıalog ornata alatyn tıimdi ınstıtýtsıonaldy qurylymǵa aınalǵanyn jáne onyń músheleri elimiz úshin mańyzdy sheshimder ázirlep, solardyń júzege asýyna kúsh salyp kele jatqanyn atap ótti, dep habarlaıdy Aqordanyń baspasóz qyzmeti.

Qazaqstan Prezıdenti Keńeste pandemııaǵa qaramastan elimizdi damytýdyń ózekti máseleleri turaqty túrde talqylanatynyn, birneshe mańyzdy bastama júzege asyrylǵanyn, sondaı-aq, qazirgi tańda memlekettik saıasattyń túrli salalaryn reformalaýǵa qatysty jańa usynystar ázirlenip jatqanyn aıtty.

– Azamattarymyz júrgizilip jatqan memlekettik saıasattyń ıgiligin keleshekte emes, qazirden bastap kórip, sezinýi kerek. Halyqaralyq reıtıngter mańyzdy bolǵanymen, halqymyzdyń áleýmettik hal-ahýalyna onyń aıtarlyqtaı áseri joq ekenin túsingen jón, – dedi Prezıdent.

Qasym-Jomart Toqaev sóılegen sózinde aýyl ákimderin saılaý máselesine qatysty elimizdi odan ári saıası jańǵyrtýdyń, Parlamentke jáne jergilikti ókiletti organdarǵa áıelder men jastardy tartý tetikterin jetildirýdiń mańyzdy ekenine toqtaldy.

Memleket basshysy menshiginde memlekettiń úlesi bar kompanııalarda basshylyqtyń 30 paıyzy áıelder bolýyn mindetteý qajettigi týraly Ulttyq keńes músheleriniń usynysyna nazar aýdardy.

– Biz bul bastamany birtindep júzege asyrý joldaryn qarastyrýymyz kerek dep oılaımyn. Mundaı qadam áıelderdiń bıznes salasyna degen qyzyǵýshylyǵyn arttyrady, – dedi Memleket basshysy.


Prezıdent otandastarymyzdyń eńbek mıgratsııasyna qatysty máseleni de kóterdi. Onyń pikirinshe, azamattarymyz tirkelý kezinde, kúndelikti turmysta jáne basqa da máseleler boıynsha ártúrli qıyndyqtarǵa jıi ushyraıdy.

– Munyń paıdaly qyrlary da bar. Mysaly, bul – biliktilikti arttyrýǵa, jańa iske mashyqtanýǵa, óz kásibin bastaý úshin qajetti qor jınaýǵa, jer kórip, el tanýǵa jaqsy múmkindik. Sondyqtan memleket óz azamattarynyń, sonyń ishinde, shet elderde jumys istep júrgen adamdardyń áleýetin paıdalanýǵa bar kúshin salady. Úkimet osy máseleniń bárin muqııat zerttep, usynys engizýi kerek, – dedi Qasym-Jomart Toqaev.

Sonymen qatar Prezıdent azamattarymyzdy elimizdiń ońtústiginen soltústigine kóshirýge qatysty ahýaldy jaqsartýdyń, kóship kelýshilerge barynsha qolaıly jaǵdaı jasaýdyń mańyzdy ekenin aıtty. Mysal retinde, Soltústik Qazaqstan oblysyn atap ótti.


– Munda kóship kelýshiler úshin jańa turǵyn úıler salynýda, kommýnaldyq ınfraqurylym damyp, ártúrli áleýmettik nysandar boı kóterýde. Yntalandyratyn qosymsha shara retinde olarǵa beriletin járdemaqynyń mólsherin eki ese, ıaǵnı, 35 aılyq eseptik kórsetkishten 70-ke deıin kóbeıtken jón dep sanaımyn, – dedi Memleket basshysy.

Qasym-Jomart Toqaev «Serpin» jáne «Dıplommen – aýylǵa» jobalaryn saralaý qajettigine toqtaldy. Bul baǵdarlamalardyń tıimdi júzege asyrylýy nátıjesinde soltústik óńir jastar úshin meılinshe tartymdy aımaqqa aınalady.

Qazaqstan Prezıdenti bilim berý júıesindegi máselelerge arnaıy toqtaldy. Ol joǵary oqý oryndarynyń uıymdyq qurylymyn ózgertý jumystary boıynsha tapsyrma bergenin aıtty.

– Kóptegen joǵary oqý orny kommertsııalyq emes aktsıonerlik qoǵamǵa aınaldy. Bul el ishinde ártúrli áńgime týǵyzýda. Sondaı-aq iri memlekettik joǵary oqý oryndary keıin jekemenshikke satylýy múmkin degen de kúdik bar. Osyǵan oraı ulttyq jáne memlekettik joǵary oqý oryndarynyń satylmaıtynyn málimdeımin. Bul másele aıryqsha nazarda, – dedi Memleket basshysy.

Prezıdent mektepterdegi tsıfrlyq ınfraqurylymdy damytý, sondaı-aq, oqýshylardy pandemııa kezinde kompıýtermen qamtamasyz etý máselelerine toqtalyp, mektepterde sapaly bilim berýdi qamtamasyz etý úshin memleket tarapynan barlyq qajetti sharalardyń birtindep qabyldanyp jatqanyn aıtty.


Osy rette, Qasym-Jomart Toqaev mektepte bilim berýdiń mazmunyna erekshe kóńil bóldi.

– Bedeldi halyqaralyq zertteý qorytyndylary bizdiń oqýshylardyń oqý saýattylyǵy boıynsha daǵdylary jetkilikti deńgeıde damymaǵanyn kórsetip otyr. Sondyqtan oqý mádenıetine baýlý, oqý saýattylyǵyn damytý elimizdegi orta bilim berý isiniń basym baǵytyna aınalýǵa tıis. Balanyń oqýǵa degen qyzyǵýshylyǵy, qorshaǵan ortany kitap arqyly tanýy mektep qabyrǵasynda qalyptasý kerek. Al kitaphana oqýshynyń sol yntasyn oıatyp, ony qyzyqty kitap álemine jeteleýi qajet, – dedi Prezıdent.

Sonymen qatar Memleket basshysynyń aıtýynsha, otandyq kitaphanalar ózderiniń aǵartýshylyq rólin joǵaltpaı, zamanaýı talaptarǵa saı bolýy tıis.


Qasym-Jomart Toqaev balalardyń quqyǵyn qorǵaý máselelerine de nazar aýdardy. Prezıdent 2022 jyldan bastap ulttyq monıtorıng júrgizý mehanızmin – Balalardyń amandyǵy ındeksin ázirlep, engizý qajettigin aıtty. Indeksti engizý óńirler boıynsha túrli salada balalardyń jaǵdaıyn jaqsartý jónindegi ulttyq saıasattyń tıimdiligin baqylap otyrýǵa múmkindik beredi.

Prezıdent erekshe muqtaj jandardy qoldaý máselesine de toqtaldy. Qasym-Jomart Toqaevtyń pikirinshe, memleket osyndaı adamdar úshin ınklıýzıvti bilim berýge, kedergisiz orta qalyptastyrýǵa, sondaı-aq, qoljetimdi ınfraqurylymmen qamtamasyz etýge jáne jumyspen qamtý múmkindigin keńeıtýge basa mán berip otyr. Degenmen, atalǵan sharalar erekshe muqtajdyǵy bar adamdardyń qajettilikterin qamtamasyz etýge áli de jetkiliksiz.

Memleket basshysy adam saýdasymen kúres máselesin kóterdi.


– Adam saýdasyna baılanysty aldyn alý jumystarynyń tıimdiligin arttyrý jáne osy salaǵa qatysty qylmystyq quqyq buzýshylyqtardy anyqtaý jóninde naqty sharalar qabyldaý qajet. Adam saýdasy men májbúrli eńbekke dýshar bolǵan barlyq adamǵa, sonyń ishinde, shetel azamattaryna kómek kórsetý kerek, – dedi Prezıdent.

Qasym-Jomart Toqaev ekologııalyq týrızmdi damytýdyń mańyzy týraly da aıta kele, memlekettik ulttyq tabıǵı parkterdi damytýdyń josparyn únemi jurtshylyqtyń talqysyna salý úrdisin engizý mindettedi.


Memleket basshysy sózin qorytyndylaı kele, aldaǵy Táýelsizdiktiń 30 jyldyǵy saıası jáne ekonomıkalyq reformalar, tsıfrlandyrý, adam quqyqtaryn qorǵaý, densaýlyq saqtaý jáne bilim berýdi damytý, ekologııany qorǵaý aıasynda ótýi kerek ekenin aıtty. Bul rette, Prezıdent Táýelsizdiktiń 30 jyldyǵy – Táýelsizdiktiń máni men qundylyǵyn sezinýge zor múmkindik beretinin atap ótti.

Aıta keteıik, Ulttyq qoǵamdyq senim keńesi qurylǵannan beri Prezıdent Qasym-Jomart Toqaev keńes múshelerimen 24 ( 2019 jyly – 16, 2020 jyly – 8) kezdesý ótkizdi. Sonymen qatar Ulttyq keńes aıasynda jarııalanǵan saıası reformalar toptamasy tolyǵymen júzege asyrylyp, 7 zań qabyldandy. Mınıstrlermen onlaın formatta 8 kezdesý ótkizildi. Bul tájirıbe jalǵasatyn bolady.


Bizdiń kanalymyzǵa jazylyńyz:

Bólisińiz:
Pikir qaldyrý
+7
Jiberý
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Erbol Janat
Erbol Janat
954-059
REDAKTOR
Janat Qapalbaeva
Janat Qapalbaeva
954-059

MURAǴAT