Qasym-Jomart Toqaev Reseı Prezıdentin TMD Sammıtine shaqyrdy
2022 jylǵy 19 tamyz 19:48

Qasym-Jomart Toqaev Reseı Prezıdentin TMD Sammıtine shaqyrdy

SOChI. QazAqparat – Qazaqstan Prezıdenti Qasym-Jomart Toqaev pen RF Prezıdenti Vladımır Pýtın Sochıde kezdesý ótkizdi, dep habarlaıdy QazAqparat tilshisi.

«Shynynda da, Qazaqstan men Reseıdiń strategııalyq seriktestiktegi qarym-qatynasy bar. Bıyl biz 30 jyl buryn ornatylǵan dıplomatııalyq qatynastarymyzdyń úlken mereıtoıyn atap ótemiz. 30 jyl buryn dostyq, yntymaqtastyq jáne ózara kómek týraly alǵashqy kelisimge qol qoıyldy. 2013 jyly bul kelisim eki el arasyndaǵy odaqtastyq qarym-qatynastar týraly sizben birge qol qoıǵan jańa qujatpen tolyqty. Sondyqtan munyń negizi óte jaqsy», - dedi Qasym-Jomart Toqaev kezdesý barysynda.

«Saýda-ekonomıkalyq yntymaqtastyqqa kelsek, ol da tabysty damyp keledi. Ónerkásiptik kooperatsııa eleýli nátıjelerge qol jetkizýde. Siz atap ótkendeı, oń saýda dınamıkasy baıqalyp otyr», - dedi Memleket basshysy.

Ótken jyly eki el arasyndaǵy saýda kólemi 24,5 mlrd dollardy quraǵan. Qazaqstan Prezıdenti atap ótkendeı, Reseı Qazaqstannyń taýar aınalymynda birinshi oryn alady. Bıyl da saýda aıtarlyqtaı tabysty damyp keledi.

«Biz BUU-daǵy, basqa da halyqaralyq ınstıtýttardaǵy negizgi alańdarda belsendi ózara is-qımyl jasaımyz. Bıyl Qazaqstan TMD-ǵa tóraǵalyq etedi. Qazan aıynda Táýelsiz memleketter dostastyǵynyń sammıti ótedi. Oǵan sizdiń keletinińizge úmittenemiz. Onyń ústine Reseı Táýelsiz memleketter dostastyǵynda mańyzdy ról atqarady. Bul shyn máninde bizdiń halyqaralyq formattaǵy ózara yntymaqtastyǵymyzdyń basym baǵyttarynyń biri», - dedi Qasym-Jomart Toqaev.

Buǵan deıin Prezıdent Qasym-Jomart Toqaev jumys saparymen Sochı qalasyna barǵany habarlanǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT