+7 (701) 759 90 19
USD 385.55 EUR 426.57
RUB 6.05 CNY 54.77
Jańalyqtar

Qasym-Jomart Toqaev prezıdenttiginiń 100 kúni: Qandaı naqty qadamdar iske asyrylýda

2019 jylǵy 19 qyrkúıek 09:40
Bólisińiz:
Qasym-Jomart Toqaev prezıdenttiginiń 100 kúni: Qandaı naqty qadamdar iske asyrylýda

NUR-SULTAN. QazAqparat – Memleket basshysy Qasym-Jomart Toqaevtyń maýsym aıyndaǵy ulyqtaý rásiminen keıin Prezıdent laýazymyna kiriskenine 100 kún toldy. Ádette, memleket basshylyǵyna nemese ózge de laýazymǵa kirisken adamdardyń júz kúndik aralyqta atqarǵan jumysyna qorytyndy shyǵarý dástúrge aınalǵan. Osy oraıda «QazAqparat» agenttigi Qasym-Jomart Kemelulynyń úsh aıdan astam ýaqytyndaǵy qyzmetiniń keıbir aspektilerine sholýdy usynady.

Uqsas jańalyqtar
Qazaqstandyqtar aptasyna kem degende 2 saǵatyn volonterlikke arnaýy tıis – Toqaev Memleket basshysy jastar arasynda ajyrasýdyń kóptigine alańdaýshylyq tanytty QR Prezıdenti jastar saıasatynyń jańa keshendi baǵdarlamasyn ázirleýdi tapsyrdy

Ulttyq keńestiń mindeti zor

Esterińizde bolsa, 12 maýsymda Qasym-Jomart Toqaev elordadaǵy ulyqtaý rásiminde Qazaqstanda Ulttyq qoǵamdyq senim keńesin qurý jóninde aıtqan bolatyn. Arada bir aı ótkennen keıin Memleket basshysy Ulttyq qoǵamdyq senim keńesi týraly Jarlyqqa qol qoıdy.

6 qyrkúıek kúni elordadaǵy Táýelsizdik saraıynda Qazaqstan Prezıdenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń alǵashqy otyrysy ótti.

Ulttyq keńestiń quramy belgili memleket jáne qoǵam qaıratkerleriniń, saıası partııalar, úkimettik emes sektor ókilderiniń qatarynan qalyptasty. Ulttyq qoǵamdyq senim keńesiniń alǵashqy otyrysyn qorytyndylaý kezinde Memleket basshysy Qasym-Jomart Toqaev qur urandatpaı naqty jumys jasaý qajettigin qadap aıtty.

«Búgin óte jaqsy pikir almasý, jalpy áńgime oryn aldy. Barshańyzǵa rızashylyǵymdy bildiremin. Jalpy, Ulttyq keńes músheleriniń ıntellektýaldyq deńgeıi óte joǵary. Sondyqtan búgin óte tıimdi, qyzyqty usynystardy tyńdadyq. Bul usynystardy jalpy men qoldaımyn. Keleshekte, amandyq bolsa, bárimiz bir ujym bolyp iske asyramyz dep oılaımyn. Bizdiń eń qundy maqsat-mindet, uǵym – bul elimiz, memlekettilik. Bárimiz Otanymyzdy súıemiz. Biraq, jaı urandar tastamaı, naqty qadamdarymyzdy jasaýymyz kerek», - dedi Qazaqstan Prezıdenti.

Memleket basshysy Ulttyq keńes músheleriniń pikirlerimen kóbine kelisýge bolatyndyǵyn aıtty.

«Sondyqtan olardy bir qujatqa jınap, saraptama jasap, tez arada iske asyrýymyz kerek. Keleshekte basqa músheler osy zalda, amandyq bolsa, pikirlerin aıtady dep oılaımyn. Jalpy aıtqanda qazir bizge úlken qujat, jospar qajet. Árbir salada jeke jospar daıyndaýymyz kerek. Aldymyzda turǵan maqsattar óte aýqymdy, kúrdeli dep aıtýǵa bolady», - degen edi Qasym-Jomart Toqaev.

Arys oqıǵasy halyqtyń birligin kórsetti

Bıylǵy 24 maýsym kúni Arys qalasyndaǵy áskerı bólimniń qoımasynda oryn alǵan jarylyspen el esinde qaldy. Oqıǵa ornyna shuǵyl túrde Memleket basshysy Qasym-Jomart Toqaev jetip, jarylys aýmaǵynan evakýatsııalanǵan turǵyndarmen kezdesip, barlyq máseleni jeke óz baqylaýyna alǵanyn aıtty.

Qalany aınalyp shyǵý barysynda Qasym-Jomart Toqaev oq-dári qoımasyndaǵy jarylys saldarynan qatty qıraǵan turǵyn úıler men ákimshilik nysandaryn aralap kórdi.

«Qala qalpyna keltiriledi, bári durys bolady. Bul tótenshe jaǵdaı, apat. Qaıtemiz, keıbir ýaqytta solaı bolady. Úkimet aqsha, qarajat beredi, kómektesedi, alańdamańyzdar! Bári jaqsy bolady. Jóndeý jumystaryn jasap beremiz. Úkimet qansha qarajat kerek ekenin sanaıdy. Sodan keıin qarajat bólemiz. Bárin túsinip otyrmyn, bári jaqsy bolady. Arnaıy kelip otyrmyn», - dedi Memleket basshysy turǵyndarmen kezdesýi barysynda.

Sonymen qatar Q. Toqaev Arystaǵy jarylystardan zardap shekkender jatqyzylǵan Shymkent qalasyndaǵy aýrýhanaǵa bardy.

Keıin zardap shekkenderge kómek qolyn sozý maqsatynda elimizde «Arys, biz birgemiz» aktsııasy bastaldy.

Shynymen de Arystaǵy oqıǵada el azamattary taǵy da eldigimizdi tanytyp, osyndaı tosyn oqıǵalarda bir judyryqtaı jumyla biletin birligimizdi kórsettik. Arystan ýaqytsha evakýatsııalanǵan aǵaıynǵa Qazaqstannyń túkpir-túkpirinen kómek berýge yqylas tanytyp jatqan azamattardyń da qarasy qalyń boldy.

Sońǵy málimetterge qaraǵanda, Arystaǵy qurylys jumystary aıaqtalýǵa jaqyn.

Prezıdenttik kadrlyq rezerv

Ulyqtaý rásiminde Memleket basshysy Prezıdenttik kadrlyq rezerv qurylatynyn málimdedi. Al tamyz aıynyń aıaǵynda Q.Toqaevtyń Jarlyǵymen QR Prezıdentiniń janyndaǵy Jastar kadr rezervi jónindegi ulttyq komıssııa quryldy. Osy oraıda QR Memlekettik qyzmet isteri agenttigi azamattardan ótinimder qabyldaý úshin onlaın-platformany iske qosatyny jarııalandy. Agenttik tóraıymy Anar Jaıylǵanova «Prezıdenttik Jastar kadrlyq rezervine»úmitkerlerge qoıylatyn negizgi talaptar týraly aıtyp berdi.

«Qatysýshylar Qazaqstan Respýblıkasynyń jasy 35-ten aspaǵan azamaty bolýy kerek. Bilimi men jumys ótili 5 jyldan kem bolmaýy tıis. Kreatıvti, talantty jastarymyzdyń kóbi shetelde turatynyn jaqsy bilemiz. Sondyqtan, baıqaýǵa sheteldegi Qazaqstan Respýblıkasynyń azamattary da qatysa alady», - dedi agenttik basshysy.

Onyń aıtýyna qaraǵanda, rezervke ótken kandıdattar ulttyq holdıngter men ulttyq kompanııalarda saıası jáne joǵary basqarý ákimshilik laýazymdarǵa, joǵary basshylyq qyzmetterge taǵaıyndalý múmkindigine ıe bolmaq.

Igi bastama

Bıyl maýsym aıynyń aıaǵynda QR Prezıdenti Qasym-Jomart Toqaev «Qazaqstan Respýblıkasy azamattarynyń borysh júktemesin azaıtý sharalary týraly» Jarlyqqa qol qoıdy.

Borysh júktemesin azaıtýǵa kim quqyly?

Tómende kórsetilgen sanattaǵy boryshker azamattardyń kepilsiz tutynýshylyq qaryzdar boıynsha boryshtyq júktemesin azaıtýǵa quqyǵy bar (2019 jylǵy 26 maýsymdaǵy jaǵdaı boıynsha): kópbalaly otbasylar; asyraýshysynan aırylý jaǵdaıyna baılanysty tólemder alatyn otbasylar; múgedek balalary bar jáne 18 jastan asqan bala kezinen múgedek balalary bar otbasylar; ataýly áleýmettik kómek alatyn otbasylar; jetim balalar; ata-anasynan kámelettik jasqa tolǵanǵa deıin aıyrylǵan, 29 jasqa tolmaǵan ata-anasynyń qamqorlyǵynsyz qalǵan balalar. Bul rette tutynýshylyq qaryz sharttary boıynsha jalpy bereshek somasy 2019 jylǵy 1 maýsymdaǵy jaǵdaı boıynsha 3 mıllıon teńgeden aspaýǵa tıis.

Búginde Prezıdenttiń borysh júktemesin azaıtý týraly bastamasynyń ıgiligin elimizdegi kóptegen otbasylar kórip jatyr. Belgili bolǵandaı, azamattardyń kepilsiz tutynýshylyq nesıesin keshirý aktsııasy ýaqytpen shektelmegen.

«Bul bir joldyq aktsııa. ıAǵnı, jalpy bereshek somasy 2019 jyldyń 1 maýsymyndaǵy jaǵdaı boıynsha 3 mıllıon teńgeden aspaýǵa tıis. Maýsym aıynda osy jańalyqty estı salyp bankten nesıe alǵandar bul tizimge kirmeıdi. Ondaı azamattar boldy. Qabyldaýǵa kelgenderdiń arasynda da biren-saran azamat boldy. Al tizimge enbeı qalǵandar, ózin atalmysh 5 sanatqa jatamyn dep esepteıtin azamattar bizge qujattarymen birge ótinishin ótkizýi kerek. ıAǵnı, aktsııa qandaı da bir ýaqytpen shektelmegen. Bul turǵyda azamattardyń alańdaýyna negiz joq», - dep túsindirdi QR Eńbek jáne halyqty áleýmettik qorǵaý vıtse-mınıstri Svetlana Jaqypova.

Sarapshylar ne deıdi?

QR Prezıdenti janyndaǵy Qazaqstan strategııalyq zertteýler ınstıtýtynyń dırektory Zarema Sháýkenovanyń paıymynsha, Ulttyq qoǵamdyq senim keńesin qalyptastyrý azamattyq sektordy bılikpen syndarly suhbatqa tartýǵa múmkindik berdi. Budan bólek, Memlekettik qyzmet isteri jáne sybaılas jemqorlyqqa qarsy is-qımyl agenttigin eki vedomstvoǵa bólý memlekettik qyzmettiń tıimdiligin arttyrýǵa, sybaılas jemqorlyqqa qarsy kúreske neǵurlym nátıjeli kóńil bólýge jol ashady. Qasym-Jomart Kemeluly barlyq memlekettik organdardy «halyq únine qulaq asatyn memleket» tujyrymdamasy aıasynda jurtshylyqpen baılanys ornatý boıynsha júıeli jumys júrgizýge shaqyrdy. Qazirgi ýaqytta Qazaqstan azamattary vırtýaldy qabyldaý bólmesi arqyly Prezıdentke tikeleı júgine alady.

Sarapshynyń atap ótýinshe, bıylǵy 2 qyrkúıektegi QR Prezıdentiniń Qazaqstan halqyna Joldaýy elimizdegi áleýmettik-saıası ári ekonomıkalyq reformalardyń naqty baǵyttaryn belgileýge negizdelgen.

Atap aıtqanda, áleýmettik salada halyqtyń az qamtamasyz etilgen toptaryna borysh júktemesin tómendetý, ıaǵnı 300 myń teńge somasyna nesıe bereshegin óteý sharasy halyqtyń tabysyn tıisti deńgeıde arttyrýǵa múmkindik berip otyr. Sonymen qatar 2020 jyldy Volonter jyly dep jarııalaý - azamattyq qoǵamdy nyǵaıtý jónindegi bizdiń jumysymyzdyń mańyzdy bóligi.

Munymen qosa, QR Prezıdentiniń tapsyrmasyna sáıkes josparlarǵa toqtalsa, aldaǵy 4 jylda muǵalimder jalaqysyn 2 ese arttyrý, 2020 jyldan bastap «Dıplommen – aýylǵa» baǵdarlamasyn qarjylandyrýdy 20 mlrd teńgege deıin keńeıtý eskerilgen.

Z. Sháýkenovanyń oıynsha, Memleket basshysynyń jastardy qoldaý baǵytyndaǵy bastamalaryn erekshe atap ótken jón. Osy oraıda Prezıdenttik jastar rezervin qalyptastyrý jańa múmkindikter ashady jáne daryndy jastarǵa arnalǵan áleýmettik lıft tetigin qalyptastyrýǵa múmkindik. Jastar úshin baspana máseleleri de sheshilýde.

Búginde Qazaqstan Prezıdenti halyqpen keri baılanys ornatý úshin áleýmettik jeliler arqyly eldegi negizgi oqıǵalar týraly jedel habardar etedi, sondaı-aq memlekettik organdardyń shuǵyl áreketi úshin tıisti tapsyrmalar beredi.

Sarapshynyń sózine qaraǵanda, Qasym-Jomart Kemeluly shuǵyl jaǵdaılarda laıyqty sheshim jasaı alatyn ári aldyńǵy shepte bola alatyn tıimdi daǵdarys-menedjeri retinde tanylyp otyr. Ekinshiden, QR Prezıdentiniń bastamalary men tapsyrmalary onyń memlekettik saıasatta oń ózgeristerge daıyn ekendigin kórsetedi. Úshinshiden, Memleket basshysy halyq úshin ashyq jáne qoljetimdi kóshbasshy ekenin, qoǵamdyq pikirge qulaq asatyn jáne halyqtyń suranystaryna jaýap beretin, halyqpen «baılanysqa» shyǵýǵa daıyndyǵyn baıqatty. Tórtinshiden, senimge laıyqty tulǵa. Besinshiden, ádilettilik úshin kúresýshi. Prezıdent azamattar múddeleriniń tepe-teńdigin saqtaıtyn jáne ulttyq ıgilikterdi ádil bólýdi ustanatyn tóreshi bolyp tabylady.

Óz kezeginde QR Prezıdenti janyndaǵy Ortalyq kommýnıkatsııalar qyzmetiniń basshysy Talǵat Qalıev Qazaqstan Prezıdenti Q. Toqaevtyń alǵa qoıyp otyrǵan maqsattarynyń kóbi uzaqmerzimdi ekenin jetkizdi.

«Eger de halyqtyń tabysyn arttyrýǵa toqtalsaq, borysh júktemesin tómendetýge negizdelgen mańyzdy bir bastama bar. Osy oraıda bul sharalar turǵyndardyń kirisin arttyrýǵa múmkindik beredi, sebebi adamdardyń birazy borysh júktemesinen bosap, ózderiniń kirisin ońtaılandyrdy. Sonymen qatar halyqtyń tabysyn arttyrý úshin ekonomıka ósimi de kerek. Memleket basshysy osy baǵytta negizgi jumysty aıqyndap berdi. Ekinshisi - sybaılas jemqorlyqpen kúres. Bul turǵyda qyzmetkerleriniń jemqorlyq quqyq buzýshylyqtary úshin birinshi basshylardyń jaýapkershiligi týraly bastama jarııa etildi. Atap aıtqanda, osy jáne basqa da bastamalardy júzege asyrý sharalary jańa qarqynmen iske asyrylatyn bolady», - dedi T. Qalıev.

Sarapshynyń paıymynsha, halyqty jumyspen qamtý men baspana máselesin sheshý qadamdary tıisti merzimdi talap etedi. Degenmen de kópbalaly jáne az qamtylǵan otbasylar úshin búginde baspana berilip jatyr, sondaı-aq osy baǵytta jastarǵa da qoldaý jasalýda. Al áleýmettik saıasatta muǵalimder men medıtsına qyzmetkerleriniń eńbekaqysyn arttyrýǵa erekshe ekpin qoıylǵan.

T. Qalıev «Rýhanı jańǵyrý» baǵdarlamasyn júzege asyrý máselesine toqtala kele, bul baǵdarlama keńeıe túsetinine senim bildirdi.

Sóz sońynda sarapshy Memleket basshysynyń barlyq maqsattary men mindetteri aıqyn ekenin, olardyń barlyǵyn iske asyrý úshin qajetti jumystar bastalǵanyn atap ótti.

Sarapshylar eleýli oqıǵa retinde atap ótken taǵy bir jaıt - Memleket basshysynyń tikeleı tapsyrmasymen QR Prezıdenti Ákimshiliginiń Ótinishterdi qaraýdy baqylaý bólimi ashyldy. Onyń meńgerýshisi bolyp QR Prezıdentiniń kómekshisi Aıda Balaeva taǵaıyndaldy.

***

QR Prezıdenti janyndaǵy Qazaqstan strategııalyq zertteýler ınstıtýtynyń málimetine súıensek, 2019 jylǵy qyrkúıek aıynyń orta kezindegi jaǵdaı boıynsha Memleket basshysy 5 zańǵa qol qoıyp, saıası, áleýmettik-ekonomıkalyq jáne mádenı salalarda 40 ókim shyǵardy. Osy kezge deıin Prezıdent 102 jarlyqqa qol qoıdy Qazaqstan Prezıdenti ortalyq memlekettik organdar, jergilikti atqarýshy organdar, bıznes qurylymdar basshylarymen, azamattyq sektor ókilderimen jáne qoǵamnyń basqa da toptarymen 140-tan astam iskerlik kezdesýler men keńester ótkizdi.

Bizdiń kanalymyzǵa jazylyńyz:

Bólisińiz:

Avtor:

Rýslan Ǵabbasov

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Bakytjan Erbasov
Bakytjan Erbasov
954-059
REDAKTOR
Erbol Janat
Erbol Janat
954-059

MURAǴAT