Jańalyqtar  >

Qasym-Jomart Toqaev Prezıdent saılaýyna qandaı uıymnan qatysatynyn aıtty

2022 jylǵy 5 qazan, 16:49
Qasym-Jomart Toqaev Prezıdent saılaýyna qandaı uıymnan qatysatynyn aıtty

ASTANA. QazAqparat – Memleket basshysy Qasym-Jomart Toqaev Pavlodar oblysy jurtshylyǵymen kezdesýinde aldaǵy saılaýǵa qandaı uıymnan qatysatyny týraly aıtty, dep habarlaıdy QazAqparat Aqordaǵa silteme jasap.

«Aldaǵy saılaýǵa qandaı uıymnan qatysatynyma qoǵam qyzyǵýshylyq bildirip otyrǵanyn bilemin. Ashyǵyn aıtaıyn, maǵan ártúrli respýblıkalyq birlestikter men partııalardan olardyń atynan úmitker bolý týraly usynystar túsip jatyr. Ásirese, jastar jáne basqa da qoǵamdyq uıymdardyń bastama kóterip jatqanyna qýandym.

Osynyń barlyǵy azamattardyń keıingi úsh jarym jylda júzege asyrylyp kelgen reformalar men ózgeristerge qoldaýdyń aıtarlyqtaı artqanyn kórsetedi. Biraq, jasaǵan usynysy men senimi úshin, strategııalyq baǵytyma belsendi qoldaý kórsetkeni úshin barlyǵyna alǵys aıtamyn.

Men belgili bir uıymnan emes, elimizde júrgizilip jatqan reformalardyń áleýmettik negizin qalyptastyratyn qoǵamdyq-saıası kúshterdiń úlken koalıtsııasynyń atynan saılaýǵa qatysqanym durys bolady dep oılaımyn. Sondaı-aq, bul Memleket basshysynyń túrli partııalardan, birlestikterden teń araqashyqtyq saqtaý qaǵıdatyn nyǵaıtýǵa múmkindik beredi.

Saılaý naýqanyn zańdardy qatań saqtaı otyra ótkizýdi qamtamasyz etý mańyzdy. Men Memleket basshysy retinde prezıdent saılaýynyń ádil ári ashyq ótetinine kepildik beremin», - dedi Qasym-Jomart Toqaev.


Foto:t.me/bort_01

Uqsas jańalyqtar
Seriktester jańalyqtary

Jańalyqtar