Qasym-Jomart Toqaev Ortalyq Azııa úshin Úndistanmen birlese ІT-mektep ashýdy usyndy
2022 jylǵy 27 qańtar 18:36

Qasym-Jomart Toqaev Ortalyq Azııa úshin Úndistanmen birlese ІT-mektep ashýdy usyndy

NUR-SULTAN. QazAqparat – Memleket basshysy Qasym-Jomart Toqaev tsıfrlandyrý salasyndaǵy yntymaqtastyq boıynsha Qazaqstanǵa Úndistannyń kompanııalaryn shaqyrdy, dep habarlaıdy QazAqparat tilshisi.

«Jalpy álemdik basty trend retinde ekonomıkany tsıfrlandyrý qalyp otyr. Qazaqstanda elektrondy úkimet tıimdi jumys istep tur. Ekonomıkanyń barsha júıe quraýshy sektorlaryn tsıfrlandyrý, sondaı-aq Smart qalalardy, medıtsına men bilim berý salalaryn damytý boıynsha jobalar júzege asyrylyp jatyr. Tsıfrlyq sheshimder banktik-qarjylyq júıede tabysty qoldanylyp keledi», - dedi Memleket basshysy «Ortalyq Azııa – Úndistan» sammıtinde.

Sonymen qatar Prezıdent qazirgi kezde jasandy ıntellekt engizýi, Big data, onlaın kommertsııa men kıberqaýipsizdik sekildi salalardy damytý suranysqa ıe ekenin atap ótti. Munymen qosa, Qazaqstanda telekommýnıkatsııa, elektrondy ónerkásip salasynda zerthanalardy, sondaı-aq elektrondy tehnıkanynyń jınaqtaý óndiristerin qurý jobalary qyzyǵýshylyq týdyrady.

«Biz osy baǵyttar boıynsha ózara tıimdi yntymaqtastyqqa daıynbyz. Úndistan kompanııalaryn qazaqstandyq naryqqa shaqyramyz. Qazaqstan halqyna Joldaýymda 2025 jylǵa qaraı 100 myńnan kem emes joǵary bilikti ІT-mamandy daıarlaý mindetin qoıdym. Osyǵan baılanysty ІT jáne ınjener kadrlardy oqytýda Úndistannyń mol tájirıbesi biz úshin qyzyqty bolyp tur», - dedi Qasym-Jomart Toqaev.

Prezıdent atalǵan saladaǵy tájirıbelik qadam retinde «Astana Hub» IT-startaptar halyqaralyq tehnoparkiniń bazasynda Bagmane jáne basqa da úndilik ІT-alpaýyttarmen birlese Ortalyq Azııa úshin ınjenerlik keńse men aqparattyq tehnologııa mektebin ashýdy usyndy.


Avtor:
Tilshi

Jańalyqtar

MURAǴAT