Qasym-Jomart Toqaev Eýropa odaǵynyń prezıdentin Qazaqstanǵa shaqyrdy
2022 jylǵy 4 shilde 16:14

Qasym-Jomart Toqaev Eýropa odaǵynyń prezıdentin Qazaqstanǵa shaqyrdy

NUR-SULTAN. QazAqparat - Memleket basshysy Qasym-Jomart Toqaev Eýropa odaǵynyń prezıdenti Sharl Mıshelmen telefon arqyly sóılesti, dep habarlaıdy QazAqparat Aqordanyń resmı saıtyna silteme jasap.

Qazaqstan Prezıdenti byltyr qarasha aıynda ótken Brıýsseldegi jeke kezdesýdiń jáne qol jetkizilgen ýaǵdalastyqtardy júzege asyrýdyń mańyzdy ekenin aıtty.

Memleket basshysy Qazaqstannyń Eýropa odaǵymen keńeıtilgen seriktestik jáne yntymaqtastyq jóninde Kelisimge qol qoıǵan birinshi el ekenin atap ótti. Bul qarym-qatynastarymyzdy jańa deńgeıge kóterdi. Qasym-Jomart Toqaev Qazaqstannyń eń iri saýda seriktesi sanalatyn Eýropa odaǵymen ornyqty baılanysty damytýǵa beıildi ekenine nazar aýdardy.

Áńgime barysynda óńirlik jáne jahandyq kún tártibindegi máseleler jan-jaqty talqylandy. Olar azyq-túlik daǵdarysynyń kúrdelene túskenine alańdaýshylyq bildirdi.

Qasym-Jomart Toqaev halyqaralyq ahýaldy jaqsartý, eń ózekti degen máseleler boıynsha senimdi dıalog ornatý úshin kúsh biriktirýdiń mańyzdy ekenine toqtaldy.

«Qazaqstan Shyǵys pen Batys, Ońtústik pen Soltústik arasynda «aralyq naryq» rólin atqara otyryp, bul iske óz úlesin qosa alar edi, – dedi Memleket basshysy.

Budan bólek Qasym-Jomart Toqaev Eýropa odaǵyn balama transqurlyqtyq dálizderdi, sonyń ishinde Transkaspıı halyqaralyq kólik baǵytyn damytý isinde yntymaqtastyq ornatýǵa shaqyrdy.

Prezıdent álemdegi energetıkalyq qaýipsizdikke tónetin qaterge alańdaıtynyn jetkizdi. Onyń aıtýynsha, Qazaqstan álem jáne Eýropa naryǵyndaǵy ahýaldy turaqtandyrý úshin óziniń kómirsýtegi áleýetin paıdalanýǵa daıyn ekenin málimdedi.

Memleket basshysy Qazaqstannyń Aýǵanstandaǵy turaqtylyqqa jáne osy elge kómek berýge qatysty halyqaralyq qoǵamdastyqtyń kúsh-jigerin qoldaıtynyn naqtylady.

Áńgime sońynda Prezıdent Qasym-Jomart Toqaev Sharl Mısheldi Qazaqstanǵa saparmen kelýge shaqyrdy.


Uqsas jańalyqtar

Jańalyqtar

Úrdis

MURAǴAT