Qasym-Jomart Toqaev: «Egemen Qazaqstan» qazaq baspasóziniń qara shańyraǵyna aınaldy

NUR-SULTAN. QazAqparat - QR Prezıdenti Qasym-Jomart Toqaev «Egemen Qazaqstan» gazetiniń 100 jyldyq mereıtoıyna oraı quttyqtaý joldady. Elimizdiń bas basylymnyń mereıtoıyna oraı ótip jatqan saltanatty sharada Memleket basshysy quttyqtaýyn QR Memlekettik hatshysy Qyrymbek Kósherbaev oqyp berdi, dep habarlaıdy QazAqparat tilshisi.

«Egemen Qazaqstan» gazetiniń ujymyn gazettiń 100 jyldyq mereıtoıymen shyn júrekten quttyqtaımyn! Bul bir ujymǵa ǵana emes búkil elimizge ortaq qýanysh. «Egemen Qazaqstan» áýel bastan ulttyq múddeni, eldik muratty jáne rýhanı qundylyqtarymyzdy dáriptep, qazaq baspasóziniń qara shańyraǵyna aınaldy. 100 jasaǵan gazettiń egemendi el bolý jolynda jasaǵan jumysy ushan-teńiz», - dep atap ótedi Memleket basshysy.

Qazaqstan Prezıdenti Smaǵul Sádýaqasov, Júsipbek Aımaýytov, Muqtar Áýezov, Beıimbet Maılın, Sáken Seıfýllın, Turar Rysqulov sııaqty Alash arystary basqarǵan basylym árdaıym qazaqtyń rýhyn bıik ustaǵandyna basa nazar aýdartady.

«Gazet ujymy keńes zamanynyń ózinde ana tilimiz ben ulttyq sanamyzdy saqtaýǵa, tól mádenıetimiz ben tarıhymyzdy nasıhattaýǵa, eldigimizdi nyǵaıtýǵa ólsheýsiz úles qosty. «Egemen Qazaqstan» Táýelsizdiktiń eleń-alańynda da Sherhan Murtaza men Ábish Kekilbaevtaı birtýar azamattardyń basshylyǵymen memleket irgesin bıiktetýge atsalysty. Qazaqstannyń shejiresi bas basylymnyń tarıhymen qatar órbidi. Táýelsizdik tańy atqaly gazettiń ár sanynda Elbasynyń barlyq bastamalary men sheshimderi, memlekettik mańyzy bar is-sharalar baıandaldy. Osy ıgi úrdis jańǵyrýdyń jańa kezeńinde jalǵasyn taýyp, egemendikter Táýelsizdigimizdiń baıandy bolýy jolynda jemisti qyzmet ete beredi dep senemin. Ǵumyry ǵasyrmen ólshenetin gazettiń torqaly toıy qutty bolsyn», - dedi Qasym-Jomart Toqaev.