+7 (701) 759 90 19
USD 424.99 EUR 504.21
RUB 5.81 CNY 65.66
Jańalyqtar

Qasym-Jomart Toqaev «Altyn júrek» eskertkishiniń ashylý rásimine qatysty

2021 jylǵy 18 maýsym 15:02
Bólisińiz:
Qasym-Jomart Toqaev «Altyn júrek» eskertkishiniń ashylý rásimine qatysty

NUR-SULTAN. QazAqparat - Qasym-Jomart Toqaev «Altyn júrek» eskertkishiniń ashylý rásimine qatysty, dep habarlaıdy QazAqparat Aqordanyń resmı saıtyna sálteme jasap.

Uqsas jańalyqtar
Qazaqstanda koronavırýstan emdelip jatqan 1,5 myńǵa jýyq naýqastyń jaǵdaıy aýyr Aqtóbeniń bas ınfektsıonıst dárigeri: Koronavırýs ınfektsııasy - ókpe ınfarkti Almatyda epıdahýal kúrt nasharlady - Jandarbek Bekshın

Memleket basshysy koronavırýs indetine qarsy kúreske zor úles qosqan medıtsına qyzmetkerlerine arnap turǵyzylǵan «Altyn júrek» eskertkishiniń ashylý rásimine qatysty. Eskertkish elordanyń sol jaǵalaýynda Almaty men Aqmeshit kósheleriniń qıylysyndaǵy jańa saıabaqtyń aýmaǵynda ornalasqan.

Prezıdent saltanatty lentany qıyp, eskertkishke gúl shoǵyn qoıdy. Sodan keıin ashylý rásimine jınalǵan medıtsına qyzmetkerleriniń aldynda sóz sóıledi.

Qasym-Jomart Toqaev óz sózinde «Altyn júrek» eskertkishiniń ashylýy asa qaýipti indetpen betpe-bet kelgen otandastarymyzdyń yntymaǵy men birligin kórsetetinin atap ótti. Memleket basshysy dárigerlerge arnap eskertkish ornatý týraly tapsyrmany byltyr «Biz birgemiz» jalpyulttyq onlaın-forýmynda bergen edi.

– Bul – jahandyq dertke qarsy kúresken otandastarymyzǵa degen el qurmetiniń belgisi. Sondaı-aq halyqtyń adal perzentterine ystyq yqylasynyń kórinisi. Eskertkish el basyna qıyndyq týǵan sátte qaharmandyq kórsetken jandardyń rýhyna taǵzym etý ornyna aınalady, – dedi Prezıdent.

Memleket basshysy densaýlyq saqtaý salasynda jumys isteıtin 10 myńǵa jýyq qyzmetker koronavırýs juqtyryp, onyń 200-den astamy qaıtys bolǵanyn jetkizdi.

Byltyr Qazaqstan Prezıdentiniń Jarlyǵymen «Halyq alǵysy» medali bekitilip, pandemııaǵa qarsy kúreste alǵy shepte bolǵan kóptegen otandasymyz marapattaldy. Prezıdenttiń aıtýynsha, bul olardyń qajyrly eńbegi men eren erligine degen halyqtyń ystyq yqylasynyń belgisi. Marapatqa ıe bolǵan azamattardyń kópshiligi densaýlyq saqtaý salasynyń qyzmetkerleri.

Qasym-Jomart Toqaev pandemııa kezinde memleket tarapynan dárigerler men jalpy medıtsına qyzmetkerlerin qoldaýǵa baǵyttalǵan yntalandyrý sharalary toptamasy qabyldanǵanyn aıtty.

– Koronavırýspen kúreske atsalysqan dárigerlerge tólenetin tek ústemeaqy men saqtandyrý járdemaqylary úshin 180 mıllıard teńgege jýyq qarjy bólindi. Úkimet bıylǵy qazan aıyna deıin tólemaqy berýdi jalǵastyrý úshin osy maqsatqa qosymsha 71,5 mıllıard teńge bóledi. Biz dárigerlerdiń eńbekaqysyn kezeń-kezeńimen arttyrýdy bastadyq. Bul úrdis jalǵasa beredi, – dedi Memleket basshysy.

Prezıdent óz sózinde medıtsına qyzmetkerlerin áleýmettik turǵydan qorǵaýdyń tıimdi júıesin qurý mańyzdylyǵyna nazar aýdardy.

– Bul júıede aýyldyq jerge kelgen mamandarǵa mindetti túrde turǵyn úı berý, birjolǵy járdemaqy tóleý jáne basqa da jeńildikter qamtylǵan. Mundaı sharalar oblystar men qalalar ákimderiniń belsendi atsalysýymen elimizdiń barlyq óńirinde qabyldanýǵa tıis, – dedi Qasym-Jomart Toqaev

Sonymen qatar Prezıdent tek qarjylaı yntalandyrýdyń jetkiliksiz ekenin aıtty.

– Medıtsına qyzmetkerleriniń moraldyq jáne zańdyq jaýapkershiligi artyp keledi. Azamattar tarapynan qoıylatyn talap ta joǵary. Kóptegen maman qysymǵa shydamaı, kásibı turǵydan qajyp, densaýlyq saqtaý salasynan bas tartýda. Ókinishke qaraı, bul alańdatarlyq jaǵdaı. Atalǵan úrdis elimizde ǵana oryn alyp otyrǵan joq. Sondaı-aq búkil álemde bes mıllıonnan astam dáriger jetispeıdi. Osy oraıda medıtsına qyzmetkerleriniń quqyqtyq jáne áleýmettik turǵydan qorǵalýyn birtindep kúsheıtý qajet. Meniń tapsyrmam boıynsha jyl sońyna deıin medıtsına qyzmetkerleriniń kásibı jaýapkershiligin saqtandyrý júıesi iske qosylady, – dedi Memleket basshysy.

Prezıdent medıtsına qyzmetkerleriniń qoǵamdaǵy mártebesin arttyrý úshin «Qazaqstan Respýblıkasynyń eńbek sińirgen dárigeri» ataǵyn engizýdi usyndy. Ataqpen birge materıaldyq syıaqy da beriledi. Onyń kólemin Úkimet belgileıdi.

Qasym-Jomart Toqaev densaýlyq saqtaý júıesinde qyzmet etý óskeleń urpaq úshin mártebeli ári tartymdy bolýy tıis dep sanaıdy.

Sonymen qatar Prezıdent orta deńgeıdegi medıtsına qyzmetkerlerine qoldaý kórsetý máselesine toqtaldy. Onyń pikirinshe, olar densaýlyq saqtaý júıesiniń basty resýrsy jáne jumystyń negizgi bóligin atqarady.

– Bizge meıirgerlerdiń jańa býynyn qalyptastyrý qajet. Olar tek oryndaýshylar ǵana emes, kóp salaly emdeý tobynyń jaýapkershilik júktelgen teń quqyqtyq músheleri bolýy tıis. Osy oraıda olardyń kásibı daıyndyǵynyń deńgeıin birtindep kóterip, meıirgerlik isiniń mártebesin arttyrý qajet, – dedi Memleket basshysy.

Prezıdent óz sózinde Elbasynyń bastamasymen iske asyrylǵan «Biz birgemiz» aktsııasy aıasynda pandemııaǵa qarsy kúreske zor úles qosqan eriktiler men metsenattardyń qyzmetin atap ótti.

Qasym-Jomart Toqaev barsha medıtsına qyzmetkerlerin kásibı merekesimen quttyqtap, «Altyn júrek» eskertkishi ornalasqan saıabaqty «Dárigerler alleıasy» dep ataýdy usyndy. Memleket basshysy jańadan ashylǵan keshen aq halatty abzal jandarǵa degen halyq alǵysynyń belgisi bolatynyna senim bildirdi.

Jıyn sońynda Memleket basshysy medıtsına qyzmetkerlerimen áńgimelesti. Dárigerler kórsetilip jatqan qoldaýǵa alǵys aıtty.


Bizdiń kanalymyzǵa jazylyńyz:

Bólisińiz:
Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Erbol Janat
Erbol Janat
954-059
REDAKTOR
Janat Qapalbaeva
Janat Qapalbaeva
954-059

MURAǴAT