Kaspıı teńiziniń Mańǵystaý bóliginen 94 óli ıtbalyq tabyldy
2022 jylǵy 28 sáýir 09:19

Kaspıı teńiziniń Mańǵystaý bóliginen 94 óli ıtbalyq tabyldy

NUR-SULTAN. QazAqparat - 2022 jyly 27 sáýirde Kaspıı teńiziniń Mańǵystaý bóliginiń jaǵalaýyn zertteýdi jalǵastyrý barysynda barlyǵy 94 óli ıtbalyq tabyldy, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń Balyq sharýashylyǵy komıtetine silteme jasap.

Baspasóz qyzmetiniń málimetterine qaraǵanda, zertteý jumystaryn EGTRM Balyq sharýashylyǵy komıtetiniń Mańǵystaý oblysy boıynsha balyq ınspektsııasy, Mańǵystaý oblysy boıynsha ekologııa departamenti, veterınarlyq qyzmet jáne jergilikti atqarýshy organ ókilderi júrgizdi.

Mańǵystaý oblysy boıynsha ekologııa departamenti zerthanalyq zertteýler úshin sý men topyraq synamalaryn aldy.

Aıta ketý kerek, ıtbalyqtardyń qańqalarynyń qatty ydyraýynan ólimniń sebepterin anyqtaý maqsatynda zerthanalyq zertteýler júrgizý úshin synamalar alý múmkin bolmady.

«Qazirgi ýaqytta óli ıtbalyqtardyń qańqalaryn joıý sharalary uıymdastyrylýda. Jaǵalaý monıtorıngi jalǵasýda, sý men topyraqty taldaýdan alynǵan synamalardyń nátıjesi belgili bolǵan soń qosymsha aqparat jarııalanady»,-delingen habarlamada.

Esterińizge sala keteıik, Kaspıı teńiziniń qazaqstandyq jaǵalaýynda ıtbalyqtyń eń kóp qyrylý deregi sany sońǵy 5 jylda oryn alǵan. 2017 jyly Mańǵystaý oblysyndaǵy Fort-Shevchenko qalasynyń aýdanynda ıtbalyqtardyń 247 óligi tabylǵan, alaıda qyrylý sebebin anyqtaý múmkin bolmaǵan.

Osyǵan deıin Mańǵystaýda ıtbalyqtardyń qyrylýyna baılanysty zertteý júrgiziletini habarlanǵan bolatyn.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT