Qarjy pıramıdalaryn basqarǵany úshin jaýapkershilik kúsheıtiledi – Senat tóraǵasy
2022 jylǵy 28 maýsym 12:33

Qarjy pıramıdalaryn basqarǵany úshin jaýapkershilik kúsheıtiledi – Senat tóraǵasy

NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine qarjylyq pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Zańdy qabyldaý qarjy pıramıdalaryn jarnamalaýǵa tartylǵan adamdardyń jaýapkershilik dárejesin anyqtaýǵa, arajigin ajyratýǵa jáne jasalǵan quqyq buzýshylyqqa mólsherles jaýaptylyqqa tartýǵa múmkindik beredi.

Qujattyń maqsaty – qarjy pıramıdasyn qurǵany jáne oǵan basshylyq jasaǵany úshin jaýaptylyqty kúsheıtý, sondaı-aq azamattardy qarjy pıramıdasyna tartýǵa alyp kelgen aqparatty (jarnamany) taratqany úshin qylmystyq jaýaptylyqty zańnamalyq retteýdi qamtamasyz etý.

Zań jobasymen Qylmystyq, Qylmystyq-protsestik kodeksterine ózgerister men tolyqtyrýlar engizildi.

Zań jobasynyń negizgi mindetteri:

- qarjy (ınvestıtsııalyq) pıramıdalaryn qurǵany jáne olarǵa basshylyq jasaǵany úshin jazany qatańdatý;

-- qarjy pıramıdalaryn jarnamalaǵany úshin tergeýge jatatyndyǵyn aıqyndaý bolyp otyr.

Sonymen qatar palata depýtattary «Qazaqstan Respýblıkasynyń Ákimshilik quqyq buzýshylyq týraly kodeksine qarjylyq (ınvestıtsııalyq) pıramıdalardyń qyzmetine qarsy is-qımyl máseleleri boıynsha tolyqtyrý engizý týraly» ilespe zań jobasyn da qabyldady.

Senat tóraǵasy Máýlen Áshimbaev qazirgi tańda qarjy pıramıdalary qoǵamdaǵy eń ózekti problemalardyń biri ekenin atap ótti. Sondyqtan ol qarjy alaıaqtyǵymen kúreste qazirgi zamanǵy syn-qaterlerdi eskere otyryp, qoldanystaǵy zańnamany jetildirýdiń mańyzy zor ekenin aıtty.

«Qabyldanǵan zańdarda qarjy pıramıdalarynyń jarnamasyn qylmys dep taný jáne olardy quryp, basqarǵany úshin jaýapkershilikti kúsheıtý kózdelgen. Bul zańdar azamattardy zańsyz qarjy jáne ınvestıtsııa jobalaryna tartýdan qorǵaýdy kúsheıtedi. Sondaı-aq jańa normalar qarjy pıramıdalarynan zardap shekken azamattar arasyndaǵy áleýmettik shıelenisti tómendetedi dep senemiz», – dedi M. Áshimbaev.

Seriktester jańalyqtary

Jańalyqtar

Úrdis

MURAǴAT