Qarjy monıtorıngi agenttigi Eljan Birtanovqa qatysty jelide taraǵan aqparatqa túsinik berdi
2021 jylǵy 29 qazan 16:19

Qarjy monıtorıngi agenttigi Eljan Birtanovqa qatysty jelide taraǵan aqparatqa túsinik berdi

NUR-SULTAN. QazAqparat - Qarjy monıtorıngi agenttigi burynǵy Densaýlyq saqtaý mınıstri Eljan Birtanovqa qatysty jelide taraǵan aqparatqa túsinik berdi, dep habarlaıdy QazAqparat.

«BAQ jáne áleýmettik jelilerde burynǵy densaýlyq saqtaý mınıstri E.Birtanovqa qatysty tergeýde onyń kináli ekendiginiń dáleldemeleri joq bolýyna baılanysty qylmystyq isti tergep-teskerý merzimderin sozý týraly aqparat taratylýda.

Bul aqparattyń aqıqat emestigin jáne onyń qoǵamda aǵymdaǵy jaǵdaı týraly qate túsinik qalyptastyrýǵa baǵyttalǵanyn habarlaımyz. Agenttiń qylmystyq isti tergeýdi osy jyldyń 7 shildesinde aıaqtady, bul týraly jurtshylyqqa birneshe ret aqparat berildi. Osy ýaqyttan bastap qorǵaý tarapy qylmystyq is materıaldarymen tanysýda. Tek sodan keıin is sotqa máni boıynsha qarastyrylýy úshin joldanady», - delingen Agenttik habarlamasynda.

Agenttik kúdiktiniń kináli nemese kináli emestigi týraly másele tek qana sotpen ǵana sheshilýi tıis ekendigin jetkizdi.

Eske salsaq, Eljan Birtanovtyń úıqamaq merzimi birneshe márte uzartyldy.

Burynǵy Densaýlyq saqtaý mınıstri Eljan Birtanov bıýdjet qarajatyn ysyrap etti degen kúdikpen qamaýǵa alynǵan edi.

Jańalyqtar

MURAǴAT