Qarjy mınıstri joǵary jalaqy alatyn hokkeıshilerge qatysty pikir bildirdi
ASTANA. QazAqparat – QR Premer-Mınıstriniń orynbasary – Qarjy mınıstri Erulan Jamaýbaev «Barys» hokkeıshileriniń joǵary aılyǵyna qatysty pikir bildirdi, dep habarlaıdy QazAqparat tilshisi.
Búgin Senatta ótken baspasóz máslıhatynda tilshiler mınıstrden «Barys» hokkeı klýbyndaǵy oıynshylardyń joǵary jalaqysyna qatysty suraq qoıdy.
Óz kezeginde E. Jamaýbaev komandalarǵa shetelden jappaı sportshylardy tartý durys emes ekenin aıtty.
«Chempıonattardy, iri jarystardy kórip júrsizder. Fýtboldan ótken chempıonatta Messı bastaǵan top jeńiske jetti. Máselen, Argentınanyń ulttyq quramasyndaǵy Messı basqa bir baı klýbta óner kórsetip jatyr. Sondyqtan, mundaı myqty oıynshylardyń kelýi el chempıonatynyń kúsheıýine múmkindik beredi. Jeńis tuǵyrynan kóriný úshin óte mánerli ári ushqyr oınaıtyn sportshylar kerek. Degenmen shetelden jappaı sportshylardy satyp alý durys dep sanamaıtynyn, alaıda myqty oıynshylardyń bolýy halyqaralyq tájirıbe», - dedi E. Jamaýbaev.
Sonymen qatar ol osyǵan deıin elimizde respýblıkalyq jáne jergilikti bıýdjet esebinen osyndaı klýbtardy qarjylandyrýǵa tyıym salynǵanyn aıtty.
«Bizdiń negizgi maqsatymyz – buqaralyq sportty damytý. Jasóspirimder arasynan myqty sportshylardy tárbıeleýge ekpin qoıylyp otyr», - dedi Qarjy mınıstri.
«Shyǵynǵa qatysty tıisti argýmenti bar. Biz eki jaqty da tyńdaýymyz kerek qoı. Eger «Barys» klýbynda jaı oıynshylar oınaıtyn bolsa, onda klýbtyń keregi de joq. Arasynda kóshbasshy hokkeıshiler bolýy kerek. Árıne, biraq kórpege qaraı kósilgen durys. Búkil aqshamyzdy sportshylarǵa jumsamaı, balans tabý kerek. Atap aıtqanda, bıýdjet esebinen tanymal oıynshylardy tartýǵa qarajat bólýdi toqtattyq», - dedi E. Jamaýbaev.
Jańalyqtar
