Qarjy mınıstri «Qazaqstan halqyna» qorynan bólinetin qarajatqa qatysty pikir bildirdi
2022 jylǵy 25 maýsym 16:36

Qarjy mınıstri «Qazaqstan halqyna» qorynan bólinetin qarajatqa qatysty pikir bildirdi

NUR-SULTAN. QazAqparat – Búgin elordada Premer-Mınıstrdiń orynbasary – Qarjy mınıstri Erulan Jamaýbaev halyqpen kezdesý barysynda salada atqarylyp jatqan jumystardy túsindirdi, dep habarlaıdy QazAqparat tilshisi.

Kezdesý barysynda memlekettik apparat qyzmetin jetildirý turǵysynda zamanaýı tsıfrlyq tehnologııalardy engizýge erekshe ekpin qoıylyp otyrǵany aıtyldy.

Memlekettiń bıýdjetti josparlaý rásimderin tsıfrlandyrýǵa arnalǵan tıisti jobasy júzege asyrylyp jatyr. Keıingi eki jylda onyń birinshi jáne ekinshi kezeńderi iske asyryldy. Bul óz kezeginde respýblıkalyq bıýdjetti elektrondy tártipte qurýǵa múmkindik berdi.

Bıyl jyl aıaǵyna deıin strategııalyq qujattar men respýblıkalyq bıýdjetti qalyptastyrýdyń barlyq kezeńi tolyq kólemde tsıfrlandyrylmaq.

Sonymen qatar, Qarjy mınıstri kezdesýge kelgen turǵyndardyń suraǵyna jaýap berdi. Osy oraıda, vedomstvo basshysyna «Qazaqstan halqyna» qorynan bólingen kómek qarajatyna qatysty saýal qoıyldy.

«Atap aıtqanda, «Qazaqstan halqyna» qory aýqymdy joba ekenin bilesizder. Meniń bilýimshe, onda 130 mlrd teńgeden astam qarajat jınaldy. Ony qurý ıdelogııasyna toqtalsaq, qorǵa jınalatyn jáne qordan bólinetin kómek qarajatyna salyq salynbaıdy. Sondyqtan, bul baǵytta eshqandaı salyq salý tártibi eskerilmegen», - dedi E. Jamaýbaev.

Mınıstr qazirgi kezde vedomstvodaǵy jáne óńirlik qurylymdardaǵy qyzmetkerlerdiń jalaqysyn kóterý jumystary júrip jatqanyn aıtty.

Kezdesý kezinde bıýdjettiń ashyqtyǵy, kadr saıasatyn jetildirý jáne basqa da máseleler kóterildi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT