111 Qarýdy urlaǵany úshin 98 adam ustaldy – Sanjar Ádilov
Qarýdy urlaǵany úshin 98 adam ustaldy – Sanjar Ádilov
2022 jylǵy 25 qańtar 18:31

Qarýdy urlaǵany úshin 98 adam ustaldy – Sanjar Ádilov

NUR-SULTAN. QazAqparat – Terrorızmge qarsy operatsııany júrgizý barysynda urlanǵan qarýdyń 515-i tabyldy. Bul týraly Ortalyq kommýnıkatsııalar qyzmetinde QR ІІM Tergeý departamentiniń bastyǵy Sanjar Ádilov málim etti, dep habarlaıdy QazAqparat tilshisi.

«Terrorızmge qarsy operatsııany júrgizý barysynda urlanǵan qarýdyń 515-i tabylyp, tárkilendi. Onyń ishinde 75 avtomat, 133 pıstolet, 2 pýlemet, 47 oıyq ári 103 tegis uńǵyly qarý, 100-den astam granata, 9 myńnan astam oq-dári. Qarýdy urlaǵany úshin 98 adam ustalyp, ýaqytsha ustaý abaqtysyna qamaldy jáne olardy zańsyz saqtaǵany úshin 61 adam ustaldy», - dedi S. Ádilov.

Osy oraıda ol urlanǵan qarý halyqtyń ómiri men qaýipsizdigine qaýip tóndiretinin, óıtkeni ol endi kez kelgen zańsyz áreketterge qoldanylýy múmkin ekenin atap ótti.

«Barlyq adamdardyń qarýdy urlaýǵa qatysy bolmaýy múmkin ekenin eskere otyryp, taýyp alǵan azamattardy erikti túrde tapsyrýǵa taǵy da shaqyramyz. Búgingi tańda 31 qarý erikti túrde tapsyrylǵanyn atap ótkim keledi. Arnaıy jedel-tergeý toptary quryldy jáne jumystaryn atqaryp jatyr, kásibı kómek kórsetý úshin ІІM Ortalyq apparatynan tájirıbeli qyzmetkerler jiberildi. Osy múmkindikti paıdalana otyryp, azamattardy taǵy da tynyshtyqqa jáne tolyq, jan-jaqty ári obektıvti tergep-tekserýge baǵyttalǵan tergeý rásimderine túsinistikpen qaraýǵa shaqyramyn», - dedi Sanjar Ádilov.


Uqsas jańalyqtar
Avtor:
Tilshi

Jańalyqtar

MURAǴAT