Karate shıto-rıýden QR birinshiliginde 600-ge jýyq sportshy baq synaıdy
2021 jylǵy 22 qarasha 14:10

Karate shıto-rıýden QR birinshiliginde 600-ge jýyq sportshy baq synaıdy

ORAL. QazAqparat – Táýelsizdiktiń 30 jyldyǵyna oraı Oral qalasyndaǵy «Jekpe-jek» sport kesheninde 23-25 qarasha kúnderi karate shıto-rıýden balalar, jasóspirimder, jastar jáne eresekter arasynda Qazaqstan chempıonaty ótedi, dep habarlaıdy QazAqparat tilshisi.

BQO Dene shynyqtyrý jáne sport basqarmasynyń basshysy Qaımen Esendııarovtyń Óńirlik kommýnıkatsııalar qyzmeti alańynda ótken brıfıngide málim etkenindeı, aıtýly jarysqa Nur-Sultan, Almaty, Shymkent qalalary men 14 oblystyń komandalary qatyspaqshy.

Onyń aıtýynsha, karate – keń taraǵan olımpıadalyq jekpe-jek túrleriniń biri. Karatemen oblysta 3 myńǵa jýyq sportshy aınalysady. Olardy 24 jattyqtyrýshy-oqytýshy baptap keledi.

«El namysyn abyroımen qorǵap júrgen sportshylar jetkilikti. Sonyń ishinde karate shotokannan álem chempıony Arsen Kýlov, dúnıejúzilik birinshilik júldegerleri Darhan Temirálıev, Nurıslam Qaıyrǵalı, Natalı Kasıkova, Nurken Hamıdolla, Arıan ıAkýbına, Azııada úzdik shyqqan Merýert Býrabaı, qurlyqtyq chempıonatta júldegerler qatarynan kóringen Kámıla Jolamanova, Danıl Tıtovty aıtýǵa bolady. Bul joly Qazaqstan chempıonatyna Batys Qazaqstan oblysynan 87 sportshy baq synamaqshy», dedi Q.Esendııarov.

Qazaqstan karate federatsııasynyń bas hatshysy Ashat Qosaqov qazirgi kezde Oralda jalaýyn kótergeli otyrǵan chempıonatqa qatysýǵa 600-deı sportshynyń tirkelgenin jetkizdi.

Eske sala keteıik, budan buryn Oralda Táýelsizdiktiń 30 jyldyǵyna oraı dzıýdodan Qazaqstan chempıonaty márege jetkenin jazǵan bolatynbyz.


Jańalyqtar

MURAǴAT