Qarashada ınflıatsııa 0,7 paıyz boldy - Ulttyq bank
2021 jylǵy 9 jeltoqsan 09:38

Qarashada ınflıatsııa 0,7 paıyz boldy - Ulttyq bank

NUR-SULTAN. QazAqparat – Qarashada ınflıatsııa 0,7 paıyz boldy. Bul týraly búgin Úkimet otyrysynda Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Qazaqstanda bıylǵy qarashanyń qorytyndysy boıynsha jyldyq ınflıatsııa 8 aıda alǵash ret azyq-túlik ınflıatsııasynyń 11,3-ten 10,9 paıyzǵa deıin, sondaı-aq aqyly qyzmetterdiń 6,9-dan 6,4 paıyzǵa deıin tejelýi aıasynda 8,9-dan 8,7 paıyzǵa deıin baıaýlady. Qarashada aılyq ınflıatsııa 0,7 paıyz boldy jáne 5 jyl ishinde ortasha mánnen tómen qalyptasty. Azyq-túlik ınflıatsııasynyń baıaýlaýy ótken jyldyń joǵary bazasyna jáne Úkimettiń áleýmettik mańyzy bar azyq-túlik taýarlaryna baǵanyń ósýin ustap turý boıynsha júrgizip jatqan jumysyna baılanysty oryn aldy. Soǵan qaramastan, azyq-túlik ınflıatsııasy burynǵysynsha baǵanyń jyldyq ósýine qosatyn úlestiń jartysyna jýyǵyn - 8,7 paıyzdyń 4,3 paıyzdyq tarmaǵyn quraıdy», - dedi Erbolat Dosaev.

Onyń atap ótýinshe, retteletin kommýnaldyq qyzmetterge tarıfterdiń qalypty ósýi aıasynda aqyly qyzmetter birqalypty artý dınamıkasyn kórsetip otyr.

Sonymen qatar, proınflıatsııalyq áser ishki óndirýshilerdiń shyǵystaryna yqpal ete otyryp, energııa resýrstarynyń aıtarlyqtaı qymbattaýyna áser etedi.

Atap aıtqanda, janar-jaǵarmaı baǵasynyń ósýi jyldyq kórsetkish boıynsha - 22,3 paıyz, onyń ishinde benzın – 18,4, dızel otyny 46,6 paıyz boldy.

«Ulttyq banktiń baǵalaýy boıynsha, tutyný baǵalarynyń maýsymdyq-tazartylǵan annýalızatsııalanǵan (jyldyq mánge keltirilgen) ósýi 2021 jylǵy qarashada 5,6 paıyz bolyp, sońǵy aılarda maýsymdaǵy eń joǵary mánnen baıaýlaǵanyn kórsetti. Alaıda, osy dınamıkanyń ornyqtylyǵyna qatysty joǵary belgisizdik saqtalýda. Inflıatsııanyń jyldyq baıaýlaýyn jáne koronavırýstyń omıkron jańa shtamynyń paıda bolýyna baılanysty belgisizdiktiń ósýi aıasynda Ulttyq bank bıyl 6 jeltoqsanda bazalyq stavkany 9,75 paıyz deńgeıinde saqtaý jóninde sheshim qabyldady», - dedi UB tóraǵasy.


Jańalyqtar

MURAǴAT